رواية (قلعة السفاحين)

-الرواية رقم (22) من سلسلة روايات (فانتازيا) للكاتب المبدع (أحمد خالد توفيق).

-اتنشرت عن (المؤسسة العربية الحديثة) فى يناير سنة 2003 يعنى الدكتور (أحمد) كان عمره حوالى 41 سنة.

-الاسم (قلعة السفاحين) بيدل على إن فى سفاحين والسفاحين دول موجودين فى قلعة يعنى البطل المرادى هو المكان...تعالوا بقى نوف إيه اللى بيحصل جوة القلعة دى.

-افنكرت النكتة القديمة بتاعة (مرة واحد راح القلعة لقاها لابسة).

-صورة الغلاف اللى رسمها الأستاذ (إسماعيل دياب) الله يرحمه فيها أميرة جميلة وشايلة خنجر عليه دم وشكلها خايف وفيها واحد غنى-يمكن يكون ملك-وبرضه خايف وفيها ناس لابسين اسود واضح إنهم السفاحين.

-افتكرت برضه (زينة) فى فيلم (الشبح) لما قالت ل (أحمد عز) (هو انت السفاح؟!).

-الغلاف الأخير بيورينا إن القلعة فى (خراسان) وإن فى مجموعة اسمها (الفداوية) وإن الشاعر (عمر الخيام) موجود معاهم وإن الفترة دى من الفترات الخطيرة فى التاريخ.

ماستر بيس

-خلى بالكوا إن أى عمل فنى أو مسلسل أو فيلم أو مسرحية أو كتاب أو رواية أواغنية أو لوحة عبارة عن جزء من أعمار ناس ومجهود منهم فضلوا يجتهدوا عشان يطلعوه للناس.

-ال (ماستر بيس) ممكن كمان يبقى تويتة أو ستاتس أو تدوينة .

-أكتب عن أى (ماستر بيس) تعدى عليها وخلينا نشوف اللى انت شايفه فيها.

-كل واحد فينا عنده معلومات وخلفيات وآراء غير التانى عشان كدة ممكن لما يكتب عن حاجة يخلينا نشوف اللى ماحناش شايفينه فيها.

-شكرأ.

أنا كنت هنا

-بعد 100 سنة لما ييجى حد يدخل عالإنترنت -لو كان فى انترنت بعد 100 سنة-ويدخل عالمدونة بتاعتك ويقرا حاجة أو يستفيد من حاجة حيعرف إنك كنت موجود هنا من 100 سنة...بمعنى آخر إنت بتسيب بصمتك فى مدونتك وبتنشر وانت مش عارف مين حيقرأ الكلام ده.

-بعد 100 سنة حتكون انت فى طى النسيان تحت الأرض لكن اللى سبته فى الدنيا زى بوست عالفيسبوك أو تويتة على تويتر أو تدوينة عالبلوجر هى اللى حتفضل منك.

مملكة الموتى

-المغامرة رقم (8) من سلسلة روايات (فانتازيا) للكاتب المبدع (أحمد خالد توفيق).

-الرواية اتنشرت فى شهر يوليو سنة 1999 ووقتها كان الدكتور (أحمد) عنده 37 سنة.

-الرواية هى الجزء الثانى من الرواية السابقة (ألعاب إغريقية) اللى اتحولت فيها (عبير) لحسناء اسمها (برسفونى) وبتواجه الأهوال مع (بيرياسوس) البطل عشان تهرب من (بلوتو) حاكم مملكة الموتى (هيدز).

-المهمة الرابعة ل (بيرياسوس) و (عبير) كانت إنهم يصارعوا أسد ضخم بس المشكلة إن (بيرياسوس) مكانش معاه سيفه لكنه واجه الأسد بشجاعة ولقى غصن شجرة مدبب ووجهة لحلق الأسد وقتله بيه.

-المهمة اللى بعدها كانت إنه يجيبوا نطاق (هيبوليت).

-راحت (برسغونى) و (بيرياسوس) لل (أمازون) باستخدام ال( بيجاس) المجنح وهناك وقعوا سرى للنساء  المحاربات المتوحشات اللى ملكتم تبقى (هيبوليت) واللى بيتسلوا بتعذيب الرجال وقتلهم ورموا شبكة على (بيرياسوس) و (عبير) وأسروهم وودوهم للملكة اللى قررت تقتل (بيرياسوس) لكنه استمر يحاربهم بشجاعة وهو مقيد فأمرت الملكة إنهم ياخدوه للقفص الحديدي لغاية ما تفكرله فى عقاب.

-(هيبوليت) حبت (بيرياسوس) وبدات (عبير) تغير منها لكن (هيبوليت) لقت إن من واجبها كملكة إنها تقتل نقطة ضعفها عشان كدة قررت إنها تقاتل (بيرياسوس) قتال حتى الموت ولو هو انتصر يبقى ياخد (برسفونى) والنطاق بتاع (هيبوليت) ولو هى انتصرت تقتله وتخلى (عبير) أسيرة عندها.

-بدأ القتال وكانت (هيبوليت) خبرتها أكبر فى النوع ده من القتال لأنه كانت حواليهم  حلبة مشتعلة بالنار وكل واحد فى الاتنين اللى بيحاربوا مربوط ناحية التانى بسلسلة وبالفعل كانت (هيبوليت) حتنتصر لولا إن (ديمترا) أم (برسفونى) اتدخلت ورجت (هيرا) مرات (زيوس) انها تتدخل واتصلت ب (هيبوليت) واستغل (بيرياسوس) الفرصة ولف الجنزير حوالين رقبة (هيبوليت) وبدأ يخنقها وفى الآخر قدر إنه يفك الحزام الذهبى بتاعها وبكدة انتصر عليها بس رفض إنه يقتلها. 

-المهمة اللى بعد كدة كانت إنهم يقتلوا (ميدوسا) اللى هى كانت امرأة عادية بس زعلت (زيوس) فعاقبها هى واخواتها وخلا إيديها من النحاس وشعرها تعابين وأى حد يبص فى عينيها يتحول لحجر وبالفعل راحوا جزيرة (إيجة) عشان يواجهوها.

-فى جزيرة (إيجة) لقى (بيرياسوس) و (عبير) الشاعر الضرير (هوميروس) صاحب (الإلياذة) و (الأوديسا) واستخدمه (بيرياسوس)  عشان يساعده فى القضاء على (ميدوسا) لأنه أعمى ونظرات (ميدوسا) مش حتأثرعليه فلبس (بيرياسوس) عصابة على عينيه وراحوا واجهوا (ميدوسا) وضربها (بيرياسوس) بسيفه وقطع رقبتها ولفه بعباية وركب ال (بيجاسوس) مع (عبير) وانطلقوا للمهمة اللى بعدها. 

-وهما ماشيين بال (بيجاسوس) لقوا (بيجماليون) بيعمل تمثال ل (فينوس) بعد كدة بيكلم التمثال وبيحبه وقاللهم إن (بلوتو) باعتلهم رسالة إنهم يروحوا ل (أبوللو) ويسوقوا العربية بتاعته اللى المفروض إنه بينشر من خلالها نور الصبح فى الكرة الأرضية كلها وقابلوه واداهم تعليمات قيادة العربية وبدأوا رحلتهم.

-أخدوا العربية ولفوا بيها الكرة الأرضية وكانوا حينجحوا لولا إنهم انخفضوا بالعربية أكتر من اللازم فالنار مسكت فى أكواخ الفلاحين ومسكت فى العربية فالخيول الى بتجر العربية هاجت واضطر (بيرياسوس) و (عبير) إنهم ينطوا فى المحيط هرباً من النار وفى المحيط أنقذتهم عراس البحر بناء على أوامر (نبتون) حاكم البحار اللى كان بيكره (بلوتو) وبكدة نجحوا فى مهمتهم المرادى.

-المهمة المرادى كانت إنهم يقتلوا ال (كراكون) الوحشى الاسطورى اللى بعتوه سادة الأوليمب انتقامً من (كاسيوبيا) الجميلة المغرورة عشان يقتل أهالى القرى ويرعبهم واهتدت (كاسيوبيا) فى الآخر إنها ممكن تضحى ببنتها (أندروميدا) للوحش عشان يسيبهم فى حالهم لكن وصول (بيرياسوس) و (عبير) للجزيرة خلاها تغير رأيها وتبعت (عبير) مكان بنتها كقربان للوحش فطار (بيرياسوس) بال (بيجاسوس) عشان ينقذها باستخدام رأس (ميدوسا) لكن لما طلع الرأس انعكست صورته فى عين الوحش فشافها (بيرياسوس) و ال (بيجاسوس) واتجمدوا فى مكانهم ووقعوا على الصخور واتحطموا.

-رجعت (عبير) لمملكة الموتى وهناك قابلت (بيرياسوس) بعد ما مات وقاللها إنه مش ندمان على فشله لأنه كافح وحاول .وبعد كدة جه (المرشد) عشان ياخدها وركبت معاه قطار (فانتازيا) بس فوجئت إن (المرشد) مش حيرجعها للواقع لكنه حياخدها لحلم تانى وبيقوللها إن الواقع بتاعها ممكن يكون هو الحلم .

ألعاب إغريقية

-الرواية رقم (7) من سلسلة روايات (فانتازيا) للكاتب المبدع (أحمد خالد توفيق).

-اتنشرت الرواية فى شهر (أبريل) سنة 1999 وكان عمر الدكتور (أحمد)-أطال الله بقاءه-وقتها 37 سنة.

-واضح إن المغامرة المرادى فى عالم الأساطير الإغريقية.

-(شريف) كان قلقان لأن (عبير) فى مغامرتها اللى فاتت فى (فانتازيا)رجعت من عالم (رمسيس) و الفراعنة ومعركة (قادش) بجرح فى إيدها ومعنى كدة إن عالم الخيال و (فانتازيا) بدا يأثر على الوجود المادى ل (عبير) عشان كدة رفض إنها ترجع ل (فانتازيا) تانى وخصوصاً إنها بقت حامل بس هى خلت (شريف) ينام وراحت شغلت الجهاز بنفسها لأنها اعتبرت الموضوع مش خطير وإن شريف بيبالغ لأنه بدأ يغير من (دى جى 2) فقررت تروح بنفسها وترجع عشان تثبتله إن الموضوع مش خطير وقررت تدخل عالم (الميثولوجيا) الإغريقية أو علم الأساطير.

-دخلت (عبير) مباشرة لعالم الأساطير ولقت نفسها حسناء من حسناوات الإغريق وشاقت (نركيسوس) أو (نرجس) اللى كان بيحب صورته فى المية وفاكرها عروسة بحر بس مش قادر يطولها فانتحر وشاف (فينوس) اللى كانت بتحب (أدونيس) اللى هو أصغر منها بكتير وأنقذته من الموت فبدأ يحبها وشافت (كيوبيد) اللى سخر منه (أبوللو) وقالع نه إنه كائن ضعيف فوجه (كيوبيد) سهم الحب فى قلب (أبوللو) ناحية (دافنى) ووجه لقلبها هى سهم الكراهية ناحيته فبدأيطاردها وهى تهرب منه لغاية ما انتحرت فى النهر واعتذر (أبوللو) ل (كيوبيد) فوجهله سهم رصاصى فشفى من حبه ل (دافنى).

-فجأة لقت (عبير) البنات بيصرخوا وبيجروا من حواليها ولقت هيكل عظمى شايل منجل وهو (شارون) ولقت شيخ دميم لابس عباية سودا عرفت إنه (بلوتو) حاكم مملكة الأموات (هيدز) ومعاهم كلب له راسين وقبضوا على (عبير) اللى بقى اسمها (برسفونى) وأخدوها لنهر (ستيكس) وهو النهر اللى بيفصل بين الحياة والموت فى الأساطير الإغريقية.

-راحت (برسفونى) لمملكة (هيدز) وشافت هناك الأهوال وعرفت إن أمها (ديمترا) قالبة الدنيا فى مملكة الحياة عند (زيوس) وهلك الزرع والضرع وجاع الناس لأنها مش لاقية بنتها (برسفونى) وهما بدأوا يشكوا إنها عند (بلوتو) وفى مرة من ضمن المرات جه الموسيقى (أورفيوس) وهو لسة حى فى المركب مع (شارون) عشان يقابل (بلوتو) ويستعطفه إنه يرجعله مراته اللى ماتت من شهر بعد ما قرصها تعبان بس (بلوتو) رفض وقرر إنه يسجنه فى مملكة (هيدز).

-بدأ (أورفيوس) يعزف ألحانه على القيثارة بتاعته وبدأت (برسفونى) تحاول تقنع (بلوتو) إنه يرجعله مراته فوافق بس بشرط إنها تروح معاه فى المركب بس ممنوع لإنه يلتت وراه عشان يبصلها وطبعاً (أورفيوس) خالف الاتفاق وبص وراه عشان يتاكد إنها موجودة فرجعت هى لمملكة (هيدز) ورجع هو لضفة نهر (ستيكس) بس بعد كدة هو مات طبيعى فرجع لمملكة (هيدز) تانى وقابل مراته.

-فى الوقت ده راحت (ديميترا) أم (برسفونى) عشان تشتكى ل (زيوس) إن بنتها (برسفونى) موجودة فى مملكة (هيدز) مع (بلوتو) فهو خاف إنه يصطدم بأخوه (بلوتو) فهددته (ديمترا) إنها تحرق مملكته كلها وكانت حتمسك فى خناق (حيرا) مرات (زيوس) بس البطل (برياسوس) اتطوع إنه يروح مملكة (هيدز) وينقذ (برسفونى) من (بلوتو) بشرط إنه يتجوزها.

-ركب (أورفيوس) المركب مع (شارون) بعد ما أقنعه إنه ميت وراح (هيدز) بس هناك اكتشف (بلوتو) أمره بس (أورفيوس) قرر إنه يتحداه فوافق (بلوتو) بشرط إن (اورفيوس) و (برسفونى) يعدوا عشر أهوال ولو نجحوا يبقى (برسفونى) حرة ولو فشلوا يبقى (برسفونى) ترجع (هيدز) وتتجوز (بلوتو).

-راح (أوريوس) و (برسفونى ) فى طريقهم وقبلوا (شيرون) أو (القنطورس) فى طريقهم وهو نص إنسان و نص حصان وهو اللى درب كل الأبطال الإغريق على فنون المبارزة وسألوه عن (أنتيوس) فقالهم إنه كائن عملاق وإن المفروض إن (هرقل) هو الى يقتله لأنه عملاق زيه بس (بلوتو) حب يعاقبهم فخلاهم يواجهوه وبالفعل واجهوه وعرفوا إنه بيستمد قوته من (جى) أو من الأرض فربطوا ايديه  وعلقوه فى الجبل فبقى ضعيف وقتله (أورفيوس) بالسيف.

-وهما معديين لقوا (أطلس) شايل الكرة الأرضية وقاللهم إنهم لازم يروحوا القوقاز عشان يحرروا (برومثيوس) وبعتلهم ال(بيجاس) أو الحصان المجنح عشان يوديهم هناك.

-وصلهم ال (بيجاس) لغاية (برومثيوس) ولقوا الرخ بياكل كبده وهو مربوط بسلاسل حديد بين جبلين وكل ما يطلعله كبد جديد ييجى الرخ وياكله عقاباً ليه إنه سرق النار من ال (أوليمب) وأهداها للبشر ففكر (أورفيوس) وطار بال (بيجاس) وخلا (برومثيوس) يشرب كحول كتير وأول ما جه الرخ راح (بروميثوس) غرقه بالكحول ورمى عليه (أورفيوس) شعلة النار فاتحرق ومات بس (أورفيوس) مقدرش يفك السلاسل الحديد ويحرر (بروميثوس) فقاله يستنى (هرقل) العملاق لما ييجى ويحرره.

-طار (أورفيوس) بال (بيجاس) وراح سل (شارون) عن المهمة الجاية فقاله المهمة إنه يقتل ال (هيدرا) أو الوحش الثعبانى ذو السبع رؤوس وراحوا يواجهوه فى المستنقعات واكتشفوا إنهم كل ما يقطعوله رأس بيطلع مكانه سبع رؤوس فقالها (أورفيوس) تمسك المشعل وكل ما يقطع رأس تكوى هى مكانه بالنار عشان ما يطلع حاجة مكانه وقطعوا راس والتانية والتالتة والرابعة بس ال (هيدر) مسك عبير بين أسنانه بواحد من رؤوسه فى الوقت اللى (أورفيوس) مش قادر يقطع أى رأس عشان ميطلعش سبعة مكانه بس (عبير) لقت المشعل فى إيديها وضربت بيه عين الوحش ففتح بقه ووقعت هى فى الوحل وكملوا قتال لغاية ما قتلوا ال (هيدرا).

-ركبوا ال (بيجاس) بعد كدة وقابلوا (إيكاروس) اللى قاللهم إن مهمتهم الجاية إنهم يقتلوا أسد وراحوا بالفعل عشان يواجهوا الأسد بس (أورفيوس) لقى سيفه اختفى.

-انتهى الجزء الأول من المغامرة ويليه الجزء الثانى بإذن الله.

خيول ورماح

-الرواية رقم (6) من سلسلة روايات (فانتازيا) للكاتب المبدع الدكتور (أحمد خالد توفيق).

-الرواية اتنشرت فى يناير سنة 1999 يعنى الدكتور أحمد كان عنده 37 سنة وقتها.

-(شريف) بدأ يحاول يهتم ب (عبير) أكتر ويديها اهتمام أكتر فوداها فى رحلة ل (الأقصر) و (أسوان) وزار أهله معاها مرتين بس هى كانت عايزة تروح (فانتازيا) فحس هو إنها أهانته وحسسته إنه جزء من الواقع الكئيب اللى هى عايزة تهرب منه بس هى بقت خلاص مدمنة ل (فانتازيا) ومش قادرة تستغنى عنها.

-(عبير) وقفت قطر (فانتازيا) فى (مصر) الفرعونية وبقت الأميرة (أرمنحات) بنت الفرعون ولقت نفسها فى السوق وفى تور هايج بيهاجمها وفجأة طلع شخص أسمر وغرس رمحه فى رقبة التور عشان ينقذ الأميرة واتعور وأخدته الأميرة معاها للقصر عشان يتعالج.

-راحت (عبير) للقصر واكتشفت إنها بنت (رمسيس) وإن أبوها مش عارفها أساساً لأنه مخلف أكتر من 90 ابن وبنت وأمر إن طبيب القصر يعالج الجندى اللى أنقذها وبالفعل الطبيب عالجه وراحت هى تزوره فاكتشفت إنه بدأ يحبها عشان كدة ضحى بنفسه عشانها وإنها حتروح مع أبوها عشان تقاتل (الحيثيين) فى (قادش).

 -حروح أعمل كباية شاى-إن شاء الله- بعدين آجى أكمل.

-الملكة (نفرتارى) مرات (رمسيس) استدعت (عبير) وقالتلها إن القصر كله بيتكلم عن علاقتها مع الجندى اللى أنقذها وإنها-كأميرة-لازم تاخد بالها من تصرفاتها وإن الملكة قررت تبعت الجندى مع الجنود اللى رايحين يحاربوا فى قادش.

-الملك (رمسيس) كان بيحتفل بعيد ميلاده ال 22 ولقى إن (موتالى) زعيم (الحيثيين) ما حافظش على معاهدته مع (مصر) فقرر إنه يكون جيش ويروح يحاربه.

-اتضح إن فى البلاط الملكى فى أمير اسمه الأمير (ساكا) بيحب (عبير)وإنه سمع عن حكايتها مع الجندى اللى طلع اسمه (حشت-آمون)فلفقله تهمة التخابر مع (الحيثيين) وبدأوا يعذبوه لغاية ما اعترف بس (عبير)راحت وطلعته من السجن.

-الأمير (ساكا) هددها إنها حتتجوزه غصب عنها فراحت تشتكيه ل (رمسيس) بس هو طردها لأن (ساكا) يبقى ابنه من (نفرتاى).

-(عبير) خلت الجارية (بت)تساعدها فى خداع حارس زنزانة (حشت-آمون) وراحت عشان تهربه فلقت فى مكانه الأمير (ساكا).

-(عبير) اكتشفت إن الجارية(بت) خاينة وباعتها ل (ساكا) بس فجأة لقت (عبير)نفسها اتحولت لراجل قوى وضربت (ساكا) وقتلته بعدين اتنكرت فى ملابسه وهربت من السجن وسمت نفسها (ناع) واتطوعت عشان تشترك فى معركة (قادش).

-فجأة لقى(ناع)نفسه سائق عربة (رمسيس) وطلعوا ناحية (قادش) وبعدين وقفوا عشان يرتاحوا ووسط الجنود لقت (عبير) الجندى (حشت-آمون) اللى هرب بعد ما (ساكا) اتقتل بس اتطوع فى الجيش عشان يحارب.

-العساكر لقوا اتنين من جواسيس (موتالى) متخفيين فى زى رعاة وقالوا ل (رمسيس) إن (موتالى) انسحب بجنوده ناحية (حلب) فقرر (رمسيس) إنه يطاردهم.

-دخل (رمسيس) قادش ومعاه حرسه الخاص وفرقة (آمون) بس وهناك حاصروهم (الحيثيين)وعملوا عليهم كماشة بس (رمسيس) فضل يحاربهم بشجاعة لغاية ما جاله المدد مع فرقة (بتاح) وانتصر فى معركة (قادش). 

-اقترحت (عبير) على (ومسيس) إنهم يرجعوا (مصر) ينظموا صفوفهم بعدين يحاربوا تانى فوافق ورجعوا (مصر) وانتهت مغامرة (عبير) ورجعت بنت تانى واللى حصل ل (رسيس) بعد كدة إن حربه استمرت 15 سنة لغاية ما مات (موتالى) والملكة (نفرتيتى) ماتت على عمر 60 سنة فابن (موتالى)عقد معاهدة سلام مع (رمسيس) وبعتله بنته عشان يتجوزها ومات (رمسيس) على 90 سنة.

-رجعت (عبير) لدنيا الواقع بس (شريف) بدأ يتضايق منها.

ذات مرة فى الغرب

-الرواية رقم (5) من سلسلة روايات (فانتازيا) للكاتب المبدع (أحمد خالد توفيق).

-الرواية اتنشرت فى أكتوبر سنة 1998 يعنى الدكتور (أحمد) كان عنده 36 سنة وقتها.

-المرة دى (عبير) حتروح عالم (الوسترن) أو عالم الغرب الأمريكى والهنود الحمر.

-المعروف إن (عبير) اتجوزت (شريف) وإنها بتحبه بس هو حبه الأول والأخير هو عالم (الكومبيوتر) والالكترونيات وهى عالمها الحقيقى هو عالم الخيال عشان كدة سمحلها شريف تستخدم (دى جى 2) وتروح عالم الغرب.

-المرة دى عبير واحدة من (الهنود الحمر) واسمها (صخرة الماء).

-(عبير) شافت سبع أشخاص بيقسموا بالدم وعايزين يريقوا الدماء فى سبيل تحقيق العدالة وبعدين لقت حصان من غير سرج عرفت إن ده حصانها وركبته وراحت للقرية بتاعتها فى الصحرا.

-عبير رجعت معسكر (الهنود الحمر) وبلغته عن (قسم الدم) اللى شافته فقرر زعيمهم اللى طلع اسمه (خمسة نمور) إنها تروح تتجسس على (ذوى الوجوه الشاحبة) أو (الأمريكيين) عشان أبوها أمريكى وهى تعرف لغتهم كويس.

-حروح أتغدى وبعدين آجى أكمل.

-(عبير) راحت مع بنات الهنود فى الفجر عشان تملى الجرار بالمية وبعدين هاجمها دب وجه واحد من (إخوان الدم) أنقذها وقتل الدب برصاصة.

-قررت (عبير) إنها تتسلل فى وسط (ذوى الوجوه الشاحبة) بإنهم يهاجموا قافلة أمريكية ويقتلوا كل اللى فيها وتفضل هى تبكى جمبها وتدعى إنها كانت فى العربية وإن (الهنود الحمر) هاجموها وعايزة توصيلة للمدينة وهناك تعرف كل خطط الأمريكيين.

-بالفعل جات عربية وركبتها (عبير) ونجح الجزء الأول من الخطة.

-وهى فى طريقها ل (هيل تاون) قابلوهم قطاع طرق وقطعوا طريق العربية.

-جه الفارس المقنع وأنقذ عبير من قطاع الطرق واختفى وبعدين راحت هى ل (هيل تاون) وحكت القصة لل (شريف) و للجنرال (سكوت) اللى اتعهد إنه حيعمل حملة تأديبية للهنود (السيوكس) وراحت (عبير) عشان تبات فى (الفندق).

-عزمها الراجل الجبان اللى كان معاها فى العربية على العشاء وهى قبلت الدعوة عشان تندمج فى الجو.

-جه راجل ضخم وضرب الراجل الجبان وقعد مع (عبير) على الترابيزة.

-الراجل الضخم (أجلى جو) كان عايز يقعد مع (عبير) بالعافية بس جه راعى بقر وأجبره إنه يمشى ويسيبها وراح يلعب بوكر مع ناس فى الحانة واتضح إنه غشاشين فاضطر إنه يضربهم واتضح إنه اسمه (الجوال) وإنه هو نفسه (شريف) جوز (عبير) فى الواقع وشاف لقلادة بتاعتها واكتشف إنها من الهنود الحمر (السيوكس) ونصحها إنها تخبى القلادة كويس.

-صحيت (عبير) تانى يوم على صوت دوشة واتضح لها إن الجنرال (سكوت) كون فرقة ورايح يقضى على معسكر (السيوكس) فقررت هى إنها تسرق حصان وتروح تحذرهم فسرقت حصان الجوال-اللى كسبه فى لعبة البوكرفى الليلة السابقة-بس الحصان كان مدرب على طريق واحد وخدها لكهف لقت فيه اجتماع سرى عاملينه جماعة (إخوة الدم) واتضح إن الحصان بتاع (هيل تاون) اللى ضربه (الجوال) فى الليلة السابقة واتضح إنه عضو فى جماعة (إخوان الدم) بس الحصان صهل بصوت عالى وكشف المكان اللى كانت مستخبية فيه (عبير).

-حاولت (عبير) إنها تهرب لغاية ما جه (الجوال) وطلع بيها من الكهوف وركب معاها حصان جديد هو سرقه وهرب وبعدين حكالها إنه هو نفسه كان واحد من (إخوان الدم) اللى طلعت جمعية سرية هدفها انها تقتل أى حد لونه مش أبيض بس هو هرب منهم ومعادش بينفذ أوامرهم فكلهم عايزين يتلوه وبعدين حكى ل (عبير) إن أبوه قتل واحد أبيض عشان اتجوز واحدة من (الهنود الحمر) وخلف منها بنت واتضح-بالصدفة-إن البنت دى هى (عبير) فقررت تقتله عشان تنتقم منه.

-(الجوال) أقنعها إنها مش حتستفيد حاجة لو قتلته لأنها محتاجة توصل لأهلها عشان تحذرهم من هجوم الجنرال (سكوت) وهى مش حتقدر تعمل كدة من غير ما هو يساعدهم وبعدين هو أنقذها من الدب ومن قطاع الطرق ومن (أجلى جو) ومن (إخوان الدم) وهى كمان بتحبه فاقتنعت وبعدين هما لقوا جندى منهك اتضح إنه كان هربان من الحرب الأهلية الأمريكية بين الشمال والجنوب وزمايله ماتوا فقرر (الجوال) إنه يساعده واداله مية وأكل وخلاه ينام جمبهم وفى الصبح لقت (عبير) إن (إخوان الدم) اكتشفوا مكانهم عن طريق شكل حوافر الحصان بس الجندى اللى هما ساعدوه-واللى كان سرق (الجوال) وهرب-ضميره صحى ورجع مرة تانية وأنقذ الجوال وخدوا خيول (إخوان الدم) وانطلقوا هاربين بعد ما هاجموهم (الهنود الحمر).

-راحوا لمعسكر (السيوكس) وشرحتلهم (عبير) إن الجنرال (سكوت) حيهاجمهم بس (الجوال) عرض عليهم السلام لأن الأمريكان أقوى منهم ومعاهم أسلحة وبعدين راح هو و (عبير) عشان يقنعوا الجنرال بالسلام لقوا عسكرى مقتول بسهم والجنود فاكرين إن (الهنود الحمر) هما اللى عملوها بس (الجوال) أثبتلهم إن (إخوان الدم) هما اللى عايزين يولعوا نار الفتنة بين (الهنود الحمر) والجنود الأمريكيين واتضح إن شريف قرية (هيل تاون) هو زعيم جماعة (إخوان الدم) فهرب بس (الجوال) لحقه وقبض عليه وقرروا يتبارزوا بالمسدسات ف (الجوال) قتل الشريف واتصاب فى كتفه.

-جه (المرشد) وانتهت الرواية ورجعت (عبير) لعالم الواقع.

فانتازيا

-بقرأ اليومين دول سلسلة روايات (فانتازيا) للكاتب المبدع (أحمد خالد توفيق) للمرة الخمستلاف وتلتمية وخمستاشر وبكتشف فى كل مرة إن شعار (المئسسة العربية الحديثة للطبع والنشر والتوزيع)اللى أصدرت الروايات دى كان شعار صحيح مية فى المية (فى كل رواية متعة دائمة).

-اكتشفت إن النسيان نعمة وبيخلينا نستمتع بالحاجات المكررة-وكل حياتنا مكرةة بالمناسبة-وكأنها أول مرة.

-السلسلة بتتكلم عن عالم خيالى مية فى المية عن طري البطلة (عبير عبد الرحمن)اللى هى ولا جميلة ولا غنية ولا ذكية بس ميزتها فى خيالها الواسع وروحها الشفافة.

-عبير ببتجوز المهندس شريف مهندس الكومبيوتر العبقرى اللى اخترع جهاز بيخلى اللى يستعمله يعيش فى عالم الخيال اللى هو من وحى خياله الشخصى ويبى عالم ملموس ومحسوس وسم الجهاز (دريم جينيريتور 1) أو (دى جى 1) وبعد كدة طوره واخترع (دى جى 2).

-عبير عن طريق (دى جى 2) بقت تسافر لأرض الخيال وتقابل الشخصيات الخيالية أو تقابل شخصيات حقيقة فى أزمنة تانية أو تروح أماكن ودول تانية فى حقب زمنية مختلفة واحنا معاها.

-الروايات بدأ إصدارها سنة 1995 والدكتور أحمد اللى هو من مواليد (طنطا) سنة 1962 كان عنده وقتها 33 سنة بس (موهبة مبكرة) ما شاء الله.

-السلسة ككل ممتعة وبنصح اللى ما قراهاش يقراها.

أحمد سلامة

-تحت إيدى اليومين دول رواية اسمها (محطة الرمل) للكاتب (أحمد سلامة) فقلت نشوف مع بعض مين هو (أحمد سلامة).

-الأول لازم نعرف غن الكاتب ده غير الممثل المعروف (أحمد سلامة) اللى عمل دور ياسين فى مسلسل (ذئاب الجبل).

-طلع دكتور بشرى من مواليد سنة 1984.

-طلع كمان واحد من مؤسسى دار (دون) للنشر وهو نفسه مدير التحرير بتاعها من سنة 2010.

-(محطة الرمل) طلعت أول أعماله الروائية.

سرك أسيرك

-كنت قاعد مع أمى قعدة صفا وبحكى معاها فقالتلى (سرك أسيرك ولو بحت بيه يبقى انت أسيره)...قلتلها يعنى ايه؟...قالتلى يعنى سرك طول ما هو جواك ومحكيتهوش لحد يبقى أسير عندك ومش خايف عليه ليهرب من سجنك لأنه سجن مكون من عقلك وضلوعك لكن لو حكيته لحد-حتى لو حلفته بأغلظ الأيمان إنه ميقولوش لحد-بقيت انت أسير عند السر وأسير عند الشخص اللى حكيتله وخايفه لحسن يحكيه لغيره والسر ينتشر.

-أمى قالتلى كمان متديش سرك لحد حتى لو كان أقرب صاحب ليك لأنك متضمنش الصاحب ده ممكن فى لحظة-حتى لو بعد سنين-يتقلب ويبقى عدوك وساعتها حيبقى عنده نقطة تفوق لأنه معاه سرك.

-مين منا مفيش جواه سر أو اسرار أو آراء أو حكايات عن نفسه أو عن غيره هو مخبيها ومحكاهاش لحد؟!

-تجربتى الشخصية علمتنى إن الشخص اللى بتحكيله سرك وتحلفه إنه ميقولوش لحد بيحكيه لحد تانى ويحلفه برضه إنه ميقولش لحد وهلم جرا لغاية ما تلاقى السر انتشر بين الناس.

-(أحمد السقا)-منصور الحفنى-فى فيلم (الجزيرة)كان بيكلم (محمود عبد المغنى)-طارق بيه وبيقول

-انت اللى حتقوللى الحقيقة يا منصور؟!

 -عندينا يا بيه محدش بيقول للغريب الحقيقة ...بتفضل مدفونة جواهم...وحتى لو قالوهاله مش حيفهمها...ماهو غريب يا بيه .

وأنا عايز أزود إن الحقيقة مش لازم تتقال للغريب ولا حتى القريب.

الكلمة

-بيقوللك إن الكلمة ليها مفعول السحر يعنى ممكن الكلمة تجرح وممكن تداوى.

-ربنا لما شبه الكلمة الطيبة شبهها بالشجرة الطيبة أصلها ثابت وفرعها فى السماء تؤتى أكلها كل حين بإذن ربها يعنى الأثر الطيب للكلمة الطيبة بيفضل ممتد زى الأمواج المتلاحقة.

-قريت قبل كدة للشيخ (محمد حسان) إن الكلمة أصلها (الكلم) وهو (الجرح) يعنى الكلمة ممكن تسبب جرح كبير لحد صعب يتداوى وممكن تطيب جرح حد وتشفيه.

-فى بلدنا-بلد الكلام-بنتكلم عشان الكلام رخيص...الطن منه ببلاش ....من غير ما نعرف الكلام رايح فين ولا ممكن يعمل ايه ويكون تأثيره ايه.

-تلاقى برامج التوك شو-اللى هيا برامج الرغى منتشرة بشكل خرافى.

-من ساعة ما شركات المحمول عرفت الجمهور عايز ايه عملت دقايق مجانية والناس بتستهلكها كلها وبنحكى فى المحكى.

-مواقع التواصل الاجتماعى (تويتر وفيسبوك والمدونات و و)كلها مليانة كلام لمجرد الكلام.

-الكلمة !

شمس التبريزى

-بقرا اليومين دول رواية (قواعد العشق الأربعون) للكاتبة التركية (إليف شافاق) وعاجبانى قوى شخصية (شمس التبريزى) الصوفى المتجول.

-عايش حياته بحرية ولا عنده ارتباطات ولا هموم ولا متجوز ولا مخلف وماشى فى بلادالله الواسعة مبيباتش فى المكان الواحد مرتين ولا بياكل من نفس الطبق مرتين.

-بيكسب رزقه من تفسير الأحلام.

-بيعبد ربنا بحب وماشى بينشر الخير مع كل خطوة بيخطيها.

-فكرة الحرية والحياة بعيد عن قيود الزمان والمكان فى رحاب الله الواسعة.

-مش حاجة تستحق التأمل؟!

اكتب

-اللى أعرفه فى المدونات إنها مساحة مخصصة ليا عشان أكتب فيها.

-أكتب كل حاجة وأى حاجة....أكتب اللى حاسس بيه.

-أكتب أفكارى قبل ما تبقى دخان فى الهوا وتروح مع الرياح.

-أكتب مشاعرى قبل تتغير .

-أكتب عشان أقول إنى موجود.

-أكتب عشان ييجى حد بعد مليون سنة ويقرا اللى أنا كتبته.

-أكتب زى ما كانوا أجدادنا الفراعنة بيكتبوا .

-أكتب.

جشع التجار

-مما لا شك فيه (فاكرين الجملة دى اللى كنا بنبدأ بيها مواضيع التعبير والإنشا فى امتحان العربى أيام المدرسة؟) إن الأسعار ولعت فى (مصر).

-بقى من البديهى إنك تنزل-لو كنت مسئول عن بيت- بورقة كبيرة من أم ميتين جنيه تبص تلاقيها اختفت بقدرة قادر .

-سمعت ناس بيقولوا ان تجار أى سلعة بيقعدوا مع بعض وبيتفقوا إنهم يحددوا سعر السلعة عشان محدش فيهم يخمهم ويرخص السعر ويبيع هو ولا عزار للمستهلك.

-هو عيب يا جماعة لو التاجر بدل ما يكسب 100 جنيه يكسب 50 بس؟أو بدل ما يكسب 1000 جنيه يكسب 700 بس؟!

-التجار بقوا عملين زى (البورصة) اللى بتتاثر بالاخبار...يعنى يسمعوا إن البنزين غلى من هنا يقوموا مغليين البضاعة تسأله ليه كدة يقوللك أصل البنزين غلى وهو ممكن يكون بيبع حاجة ملهاش علاقة بالبنزين من قريب أو بعيد.

-تسأل واحد تانى البطاطس غالية ليه يقوللك أصل الدولار غلى...طب انت مالك ومال الدولار هو انت شغال فى (سوق العبور) اللى فى (ماساشوستس)؟واللا بتبيعلى-لا سمح الله-بطاطس مستوردة؟!

-اخواننا التجار....اكسبوا بس بالعدل !

حنة العريس

-حد جرب قبل كدة يا جماعة ركوب الخيل؟!

-إحساس متعة لا يوصف لما تحس كدة انت طاير فى الجو من غير قيود برفقة كائن نبيل جميل قوى زى الحصان.

-الإحساس ده أنا جربته فى فرحى أو بمعنى أصح يوم الحنة بتاعتى.

-عندينا فى الصعيد يا بيه عادات لسة موجودة(بتعطيش الجيم) وهى اللى بتميزنا وبتميز مناسباتنا عن مناسبات أهل البندر ومنها الزفة بتاعة يوم الحنة بتاعة العريس.

-يجهزولك الحنة وتقعد زى السلطان-وبالمناسبة العريس فى الأيام دى بيبقى اسمه الأمير-والناس كلها تحنيك من شعرك لغاية رجليك.

-الناس تنقطك ويكون فى مكروفون بيتقال فيه اسم اللى بينقط مع جملة (خلف الله عليكوا يا محبين.....اسم اللى بينقط وبعد كدة جملة (ينقطوا بالفضة وخلافة خير).

-نيجى بقى لأجمل حتة فى الموضوع تركب حصانك يا باشا والبلد كلها ماشية وراك-كأنك صلاح الدين الأيوبى) ورايح مباشرة ل (حطين) ومعاك عربيه فيها (دى.جى) وهى دى اللمسة الحضارية الجديدة فى الزفة اللى بتدل على مدى التطور التكنولوجى اللى وصل ليه الصعيد فى (مصر).

-إوعى فى اللحظة دى تبان إنك خايف من الحصان أو هايبه...لزم تركب بنفسك من غير ما حد يساعدك ويكون ضهرك مفرود والزفة تلف البلد كلها ومفيش مانع من إن الزفة توقف قدام بيت العروسة وتتقلب انت لبلياتشو مطلوب منه انه يقف على ضهر الحصان ويرقص بالعصاية وهو واقف مع احتمالية إن الحصان يتحرك من كتر الزحمة اللى حواليه.

-يلف الحصان والناس كلها بيسقفوا على أنغام ال (دى.جى) وتمسك انت عصاية-وظهرت مؤخراً عادة الرقص بالمطواة وهى دى العادة اللى أخدناها من (الثورة)-وتفضل ترقص بيها.

-لازم وانت ماشى بالحصان تنزل من عليه عند مقامات أولياء الله الصالحين اللى فى بلدكم وتقرالهم الفاتحة.

-توصل بعد كدة الزفة لشط النيل ولازم تنزل من عالحصان وتمسك طوبة وترميها بكل عزمك فى المية وكل ما رميت الطوبة أبعد كل ما كان متوقع ليك سعادة أكبر فى حياتك.

-تخلص بعد كدة الزفة وربنا يتمم بخير.

بس سيبك....العادات الجميلة دى هى اللى بتدى طعم للقرى بتاعتنا عن أى مكان تانى.

الحكم على الناس

-أسهل حاجة بالنسبالنا دلوقتى إن الواحد فينا يحط رجل على رجل ويصدر أحكام ولا كأنه-الحاكم بأمر الله.

-فلان ده بخيل...علان ده كويس..ترتان ده وحش...ده خاين...ده وطنى...ده متدين...ده كذا وكأننا اطلعنا على الغيب وشفنا ضماير الناس واحطنا بكل شئ علماً.

-جملة (إبدأ بنفسك)بنسمعها دايماً ومحدش فينا بيطبقها....امتى كانت آخر مرة حد فينا حاول يحسن من نفسه أو يتخلص من عيوبه؟

-الكلام بالنسبالنا شئ سهل و(عليهوش جمرك)زى ما بنقول وعشان كدة كلامنا كتير و99 فى المية منه جعجعة وكلام لا قيمة له بالمرة.

-تتكلم كلمة على حد كأنك وجهتله سهم بيشوه صورته فى نظر الأشخاص اللى بيسمعوا الكلام ده منك.

-فى العالم الافتراضى المسألة بقت أسهل وأسهل وبقى إصدار الأحكام بالجملة و(زغرتى ياللى منتيش غرمانة).

-اتخيل كدة انت لو ذكرت اسم شخص فى كلامك كانك فتحت عنه (هاشتاج) وحط بقى كل أنواع الشتايم لو انت بتكرهه وكل فضائل الدنيا لو انت بتحبه...هيصة يا عم الحاج.

ترضى الناس=تخسر الناس

-حقيقة بسيطة كلنا عارفينها بس بنتجاهلها أو بنتناساها كالعادة وهى إن اللى بيحاول يرضى كل الناس حتجيله لحظة ويخسر كلالناس بالتدريج.

-لما (غسان مطر) قال ل (حزلقوم) فى فيلم (لا تراجع ولا استسلام) (إعمل الصح) عبر -بكل بساطة-عن اللى المفروض البنى آدم مننا يعمله بغض النظر عن رأى الناس.

-أكيد برضه كلنا فاكرين قصة (جحا) لما كان معاه هو وابنه حمار ولما مشيوا جمب الحمار ومحدش فيهم كان راكبه الناس قالوا عنهم (إيه العبط ده...معاهم حمار وماشيين على رجليهم؟) ولما ركب (جحا) الحمار الناس قالوا(إيه القسوة دى هو راكب ومخلى ابنه ماشى؟) ولما خلى ابنه يركب وهو مشى الناس قالوا(ايه الولد اللى مش متربى ده؟...مخلى أبوه يمشى وهو راكب) ولما ركبوا هما الاتنين الناس قالوا (ايه القسوة والجحود ده؟...هما الاتنين راكبين والحمار المسكين مش قادر يشيلهم) وآخر ما (جحا)زهق قرر إنه هو وابنه يشيلوا الحمار وهما بيعبروا النهر الحمار وقع فى المية ومات....وما نابش (جحا)غير الخسارة عشان سعى إنه يرضى الناس.

-الحياة مواقف وأحياناً بتحطك فى موقف مواجهة إنك لازم تقول كلمة الحق حتى لو حتخسر ناس أو تضحى بحاجات معينة.

إليف شافاق

-بيقوللك (إليف شافاق) دى كاتبة تركية اتولدت فى (ستراسبورغ) اللى هيا على إيدك وانت داخل شرق (فرنسا) نواحى حدود (ألمانيا)كدة ولو مش مصدقنى افتح (كتاب الجغرافيا) صفحة (أوروبا)حتلاقى كلامى مكتوب باسمى.

-بيقوللك إنها من مواليد سنة 1971 يعنى عندها دلوقتى فى 2014 حوالى (43 سنة).

-اسمها فى البطاقة (أليف بيلغين) وأبوها يبقى فيلسوف اسمه (نورى بيلغين) وامها اسمها(شفق أتيمان) وربنا كرمها بعد كدة وبقت دبلوماسية.

-بعض أعمالها اترجمت لأكثر من 30 لغة وهى لسة شابة.

-بيقوللك إنها عاشت بين مدريد وعمان وكولونيا-عشان طبيعة شغل أمها كديبلوماسية- بعد كدة رجعت تركيا وبعدين راحت تكمل دراستها فى (أمريكا) واشتغلت هناك أستاذة (دراسات وأجناس) فى (جامعة أريزونا).

-أبوها وأمها اتطلقوا وهى عندها سنة واحدة واللى ربتها هى أمها  وبعد كدة رجعت هى وأمها من (فرنسا) ل (تركيا) وهى بتقول إن كتاباتها متأثرة بالجو اللى مكانش فيه سيطرة ذكورية عليها وبعد كدة بقت تاخد اسمها الأول واسم أمها-واضح انها بتحبها قوى-وتوقع بيه أعمالها الأدبية (أليف شافاق).

-اتجوزت سنة 2005 صحفى تركى وخلفت طفلين ولد وبنت.

-بيقوللك اتنشرلها (12) كتاب تمانية منهم روايات بالتركى والانجليزى بعد كدة ربنا كرمها برواية (قواعد العشق الأربعون)-وهى دى اللى عرفتنى عليها بالمناسبة- اللى اتنشرت سنة 2010 واتباع منها 550 ألف نسخة-اللهم لا حسد-وبكدة بقت الأعلى مبيعاً فى (تركيا).

-عايشة دلوقتى فى (أمريكا) والحياة زبادى فى الخلاط معاها.

-روايتها الأولى (الصوفى) سنة 1998 اخدت جايزة (رومى)كأحسن عمل أدبى فى (تركيا).

-روايتها التانية (مرايا المدينة)بتتكلم عن التصوف عند المسلمين وعند اليهود فى القرن ال (17).

-روايتها (قصر البرغوت) أخدت أعلى مبيعات فى (تركيا)...شكل البلية لعبت معاها.

-روايتها (النظرة العميقة)حصلت على جايزة اتحاد الكتاب فى (تركيا) سنة 2000.

-روايتها (لقيطة اسطنبول) كتبتها بالانجليزى وحققت-برضه-أعلى مبيعات فى (تركيا) سنة 2006 بس اتكلمت فيها عن قضية الأرمن  ومدى اضطهاد الأتراك ليهم فاترفع عليها قواضى واتحكم عليها بالسجن تلات سنين بس سقطت عنها التهم.

-رأيها إن (النساء هن الأقدر على القص والسرد) وإن موهبتها راجعة ل (الحكمة النسائية).

رواية (هيبتا)

-رواية للكاتب المصرى الشاب (محمد صادق).

-صادرة عن (دار رواق للنشر) ومشاركة فى معرض القاهرة للكتاب 2014 فى دورته ال .45

-فى الأول بتلاقى الإهداء (إلى كل من سمح للدنيا بقتل كل شئ فيه) ...عنوان صادم شوية يا ترى إيه الحاجات اللى الدنيا بتقتلها فينا؟....الضمير!...الفرحة!....الحب!...الأخلاق!

والحاجة التانية إن الشخص المهدى ليه هو اللى سمح للدنيا إنها تعمل كدة فيه فهو متحمل لجزء من المسئولية.

-فى البداية بنقابل المحاضر (أسامة حافظ)استشارى العلاقات الأسرية والزوجية وواخد ماجستير فى( دراسة النفس البشرية وسلوكياتها فى اختيار شريك الحياة) يعنى فى الحب.

-بيعرفنا الدكتور أسامة معنى (هيبتا) وهو رقم سبعة بالإغريقى وتعريفها (السبع مراحل فى الحب) أو (السبع مراحل فى العلاقات العاطفية).

الحكاية أربع قصص (أ)و (ب) و (ج) و (د) بنتعرف من خلالهم على ال (هيبتا).

-أول قصة (أ) واضح إنها لشخص ممل ملول يعنى إنه بيبص لكل حاجة للدنيا بفتور وعنده (35 سنة) وواحدة بدأت تمل منه لكنها مضطرة تكمل معاه عشان عندها 30 سنة والقطر بدأ يفوتها.

-بدأت تمل منه فقالتله إنها متقدملها عريس عشان تشوف رد فعله فقاللها خلاص روحى شوفيه يمكن يكون فى نصيب.

-البنت حتموت على كلمة من (ا) وهو منفضلها تماماص ويوم ما يقول الكلمة بيقولها من ورا قلبه لكنها بتصدقه تماماً فيها.

-بيظهر فى الكادر (ج)وهو رسام وقاعد مع مجموعة شباب وفجأة بيرسم رسمة لبنت بتضحك بس عينيها بتدمع وليها جناحين بس مقيدة وصاحبها بيغير عليها من (ج) لن البنت بدات تميل ل (ج)عشان حست إنه فاهمها.

-قصة (د) بدأت من بطولة طفل عنده (7 سنين) ونفسه يطلع طيار صاحبته مش بتحب الفيونكات وقالتله كدة بعد كدة أنكرت الكلام قدام مامتها ومامته فهو ضحى واعترف إنه هو اللى بيكدب واتحمل العقاب بشجاعة.

-المرحلة التانية (اللقاء)

المرحلة دى ليها تلات اقسام

-أول قسم هو (ما قبل المحاولة)

(المرحلة اللى الواحد بيخون كل حاجة عاهد بيها نفسه قبل كدة..كل وجع اتوجعه وكل قرار بإنه مش هيسلم قلبه تانى لحد...بيخون الخوف من الجرح...بيخون عقله...بيخون حتى نفسه).

-(أ) شكله اتجنن...واقف على سور البلكونة ومشغل أغانى وفارد ايديه على جمبه من غير ما يمسك فى حاجة وهو فى الدور الرابع والهوا بيحرك جسمه.

-أخيراً ظهر (ب) وهو عيان  عنده (17 سنة)وحيعمل عملية بس الدكتور بتجيله كل شوية حالات طوارئ فيضطر يأجل له العملية من 3 أسابيع.

-أخد (ب)حقنة رجية كالعادة استعداداً للعملية وهو واقف فى البكونة فى المستشفى فابل (سارة)البنت العيانة اللى قالتله إن عمليته حتتأجل تانى بسببها لأنها (حالة طارئة).

-واضح إن الكاتب مختار أبطال القصص من أربع مراحل سنية (أ) عنده (35 سنة) و (ب) عنده (17 سنة) و (ج) عنده (24 سنة) و(د) عنده (7 سنين).

 -(علا)البنت اللى رسمها (ج) اتضح إنها كل يوم بتتخيل نفسها بالشكل ده وطلع (ج)كاتبلها بريده الإلكترونى على ضهر المنديل هى اتضايقت واتصلت بأحمد حبيبها عشان تشتكيله فنفضلها عشان كان قاعد مع أصحابه فضاففت الإيميل بتاع (ج) وهو قبل طلب الإضافة.

-نرجع ل (ا) اللى عايز ينتحر بس نفسه الموضوع ميبقاش بإيده هو ويبقى ضربة من القدر عشان يتخلص من كل الألم اللى هو فيه.

-(د)راح ل (مروة) وكان جايبلها معاه حاجة فلقاها فى الأوضة مع بنت تانية وولدين فبدأ يشعر بالغيرة.

-(أ) فى آخر لحظة قبل ما ينط لمح واحد قاعدة على سطح المبنى اللى ف آخر الشارع وبتراقبه بلا مبالاة فاتراجع عن قراره.

-بيقوللك إن مفيش حاجة اسمها حد ياخد وقت عشان يحب لأن الحب بييجى فجأة حتى لو كان احساس بسيط فى الأول.

-(ب) راح عشان يسأل الممرضة عن (سارة) فقالتله إنها حتعمل النهاردة رابع عملية ورم فى المخ رغم إن سنها 20 سنة بس فحس إنه حيفتقدها لما راحلها الأوضة وملقاهاش.

-(ج) كتب فى المحادثة ل (علا) إنه بيحبها وإنه حيخليها تحبه.

-(أ) البنت اللى على السطوح مشيت على طرف السور وقلدته فى مشيته وشاورتله إن جنانك ملوش لازمة فابتسم وهى مشيت.

-المرحلة الثانية هى مرحلة (كيوبيد) أو (الوقوع فى الحب)

-(أ) نزل من بيته بسرعة وراح للعمارة اللى على الناصية عشان يتأكد إن البنت اللى شافها دى حقيقية مش هلوسة وطلع على السطح ولقاها فعلاً موجودة هناك.

-(ج)عرف ازاى يجذب انتباه (علا) ويخليها تتابع اللى بيقوله فى الشات.

-(أ) لقى البنت على السطوح وكانت مشغلة سماعات من موبايلها وهو مش مصدق إنها حقيقة مش خيال لغاية ما حضنها وبكى على كتفها وهى كمان بكت وفى الآخر سألها (إنت مين؟).

-واحد من طلبة دكتور (أسامة) اسمه (يحيى) اعترض على القصص وقال عليها خيالية زيادة عن اللزوم ولا يمكن تحصل فى الحقيقة وفى (مصر) فرد عليه الدكتور (أسامة)بإنه إيه المانع لما نصدق شوية خيال يفهمونا كل اللى احنا بنحس بيه وازاى بنقع فى فخ (الحب) اللى بييجى منه كل الألم والعذاب والمعاناة.

- نرجع ل (د) اللى راح أوضته وهو زعلان من (مروة) وهى جات تصالحه فقاللها (أنا مخاصمك)فقالتله (أنا عملتلك ايه) وعيطت فقاللها (ليه كنتى بتلعبى مع عيال تانية)فقالتله (مامتهم قالتلى كدة وأنا لازم أسمع كلام الكبار عشان ما أروحش النار) فوراها الرسمة اللى رسمهالها فابتسمت وباسته فى خده .

-الجزء التالت من مرحلة (المحاولة)مرحلة (الموافقة)

-(أ) باين عليه حب البنت بتاعة السطوح  ولما طلع على السور المرادى كان خايف على نفسه لأنه لقاها خلاص ولما طلعت هى على السور مرة تانية اترجاها إنها تنزل واتحداها إنه يخليها تحبه.

-(ب) راح يزور (سارة) بعد العملية فلقاه مكتئبة ومرضيش يقوللها هو مصاب بإيه فهى نصحته يعمل كل اللى بيحبه قبل ما الألم يزيد عليه فاتصل ب (دنيا)وقاللها (أن بحبك).

-(ج) كتب ل (علا) حاجات وأسرار عنها محدش يعرفها غيرها وبيقول إنه اتوقعها.

-(د)عرض على (مروة)الجواز فى عيد ميلاده الثامن وهى وافقت فهو راح يكمل  لعب مع أصحابه.

-(أ) عرض الجزاز على بنت السطوح وفى نفس الوقت قاطعته رنة من (سلمى) البنت اللى كان معاها.

-(ب) قال ل (دنيا) إنه بيحبها واستنى ردها فردت عليه بإنها هى كمان بتحبه من ساعة ما عرفته فنسى كل حاجة عن ألمه ونسى الدنيا كلها.

-(ج) بعد ما قال ل (علا)عن أسرارها وحلل شخصيتها قالله اعمليلى (ديليت)و (بلوك) فقالتله ليه فقاللها أنا مش عايز أتسببلك فى أى ندم فقالتله مش حندم.

-(أ) رد على (سلمى) وقاللها (أنا نزلت أشتى سجاير) و(اقفلى دلوقتى عشان متضايق) فردت عليه-رغم انها مجروحة-(خلى بالك على نفسك) ولما قفل فضلت (بنت السطوح)تسخر منه فسابها ونزل من غير ما يرد عليها.

-المرحلة التالتة (العلاقة)

أو مرحلة (الحياة بقى لونها بمبى)

-(أ) اتحول لجزار حقيقى ...أو أكثر قسوة وأنهى علاقته مع (سلمى) بكل ما فى كلمة (قسوة) من معنى وضرب جرس بيته لقى (بنت السطوح) فى وشه وباسته ودخلت البيت عنده.

-(ب) راحتله (دنيا) عشان تزوره فى المستشفى وجابتله هدية عبارة عن رسمة كاريكاتورية ليه  خلته ينسى كل مرضه وألمه واعترفلها إن عنده ورم فى ضهره بين الفقة الرابعة والخامسة بيضغط على الأعصاب.

-(علا) كانت مع صاحبتها فى (سيتى ستارز) واتصلت ب (ج)اللى بقى يكلمها يومياً فى التليفون بالساعات وقالتله ييجى يقابلها والدنيا كانت بتمطر مطرة شديدة فراحلها رغم المطرة وقعدوا يرقصوا مع بعض تحت المطر.

-(د) و(مروة) كانوا رايحين يلعبوا بالأتارى بتاع (د) فى شقته فلقى أمه انتحرت.

 -(أ) بعد ما بنت السطوح)اللى اسمها (رؤى) راحتله (مارسوا الجنس) مع بعض-وبالمناسبة اسمها (زنوا)عشان نسمى كل حاجة بأساميها-واكتشفنا انه كان متجوز قبل كدة لمدة سنتين وخلف بنت بس ماتت وبعد كدة هو ومراته اتطلقوا.

-المرحلة (الرابعة) و (مرحلة الإدراك)

-(أ) لسة عايش مع (رؤى) فى دنيتهم الخاصة وبيرقصوا مع بعض فى سعادة حقيقية.

-(ب) العملية بتاعته اتحددت فى المغرب فى نفس اليوم وانتابته حالة من الاكتئاب والخوف بعد ما كان عايز يعمل العملية ومستعجل عليها واتعاطفت معاه (سارة) و (دنيا).

-(ج) قرر فجأة إنه يتجوز (علا) بعد ما قالتله إنها سابت (أحمد).

-(د) أخد صدمة شديدة جداً لما عرف إن أمه انتحرت وابوه مرضيش يعملها عزا عشان هى ماتت كافرة وبعده بفترة راح اتجوز واحد تانية.

-(أ) سأل (رؤى ) عن قصة حياتها فقالتله إنها كانت مخطوبة لواحد وبعد كدة كان واخد مخدرات فاغتصبها وبعد كدة أهلها ضغطوا عليها عشان توافق إنها تتجوزه منعاً للفضيحة بس هى رفضت وقالتلهم إنها حتروح تسكن بعيد عنهم وتصرف على نفسها وهما يقولوا للناس إنها سافرت برة فوافقوا-وده جرحها جداً-بعد كدة (أ) عرض عليها الجواز فهى وافقت.

-(ب) دخل العملية وطلع منها بس الظاهر إن العملية فشلت.

-(ج) كان قاعد مع (علا) فى الكافيه بعدين قعد على ركبته وقدملها دبلة فضة عشان يتجوزها مع إنه عارف إنها موافقة بس هو حب يسعدها.

-المرحلة الخامسة (مرحلة الحقيقة)

-الإحساس المسيطر فى أول المرحلة دى هو (السيطرة) أو (الامتلاك).

-(أ) و (رؤى) اتجوزوا فعلاً وبعد شوية حست (رؤى)إنها بدأت تتخنق شوية لأنه كل شوية شاكك إنها فى لحظة معينة حتسيبه وهى تأكله إنها بتحبه ومع ذلك فهو لسة شاكك.

-ثانى إحساس فى مرحلة (الحقيقة) هو احساس (عدم تقدير حجم المشكلة عند الطرف الثانى) أو (عدم التقدير بصفة عامة).

-ثالث إحساس فى مرحلة (الحقيقة) هو إحساس(الضعف) أو (الاحتياج).

-(ب) عمل العملية بس حصل خطأ جراحى عمل شلل فى عضلات الساقين مع ألم رهيب وكان بيحكى ل (دنيا)عن ألمه والوقت كان متأخر فأمها سمعت وأمرتها إنها تقفل تليفونها. 

-رابع إحساس فى مرحلة (الحقيقة) هو إحساس (عبء المسئولية) أو (الحمل).

-خامس إحساس فى مرحلة (الحقيقة) هو إحساس (الغيرة) و (الشك).

-(ج) زعل من (علا) عشان راحت حفلة (أحمد) كان موجود فيها وفضلت تضحك وتهزر معاه وفى الآخر وصلها بعربيته.

-(ج) راح لوالد (علا) واقدمله وأبوها وافق عليه بس اتردد من إن معندوش مصدر ثابت للدخل فاتوسطله عند ناس عشان يشتغل فى مجال الديكورات لكنه كان مستهتر فى شغله.

-سادس إحساس فى مرحلة (الحقيقة) هو (التطبيع) أو (عدم الرضا) و (محاولة التغيير).

-(ج) بدأ يحاول يتهرب من الشغل و(علا) حبت تضغط عليه عشان يركز ففى شغله لكنه مبيحبش يبقى مغصوب على حاجة.

-سابع إحساس فى مرحلة (الحقيقة) هو إحساس (الملل).

-(د)كبر وبقى عنده 10 سنين وابوه جاب من مراته الجديدة ولد وبنت ومع ذلك ف (د) دخل فى مرحلة اكتئاب لغاية ما (مروة) زهقت منه وبدأت تلعب مع أولاد تانيين وبعدين قالتله (مش عايزة أعرفك تانى).

-المرحلة السادسة (مرحلة القرار).

-(أ) لسة مسيطر عليه إحساس إن (رؤى)حتسيبه ومش حتقدر تكمل معاه ولما اتأخرت علي فى الشغل قعدت الهواجس تلعب بدماغه لغاية ما رنت عليه فى التليفون وقالتله إنها على سطح بيتها القديم اللى قابلها فيه أول مرة وقالتله ييجيلها هناك عشان يقابلها.

-(د) وصل لمرحلة (المراهقة) وبقى عنده 12 سنة وأبوه ومرات أبوه وأخواه راحوا يقضوا أجازة وهو مرضيش يروح معاهم بس هو كان مصر يعرف ليه أمه انتحرت وراح يسأل (أم مروة).

-(ب) دخل فى طور الاكتئاب بسبب حالته الجديدة وبدأت (دنيا)تبعد عنه شيئاً فشيئاً وبدأ يدخن مع إنه فى الأول كان بيكره التدخين والمدخنين.

-(ج) قابل (علا) قبل فرحهم بيومين وأصرت هى إنها تعرف كل حاجة عنه وأصرت إنها تعرف إزاى هو عرف إنها كانت حتنتحر.

-(أ) راح السطوح عشان يقابل (رؤى) فقالتله إنهم لازم يعزلوا من الشقة اللى بتفكر(أ) بكل حاجة وحشة فى حياته وقالتله إنها حامل ففرح فرحة الدنيا وبعدين وقف على رف السور عشان يحتفل بفرحته و...ووقع من عالسطوح.

-المشاعر الخمسة اللى ممكن تنقذ أى حب من السبع مشاعر الهدامة اللى فى مرحلة (الحقيقة) هما (الاحترام...الاحتواء...الصراحة...التضحيات...الصفقة).

-المرحلة السابعة هى مرحلة (النهاية).

-المفاجأة الكبيرة (ج) طلع هو نفسه (د)بس أمه كانت متجوزة ومخلفته من واحد سافروا برة (مصر) وسابها من غير أسباب وبعدين هى رجعت واتجوزت واحد تانى وانتحرت بس محدش عارف ليه يمكن عشان انت بتفتكر جوزها الأول أو عشان كانت مفتقدة للحرية المهم إن أبوه واخواته ماتوا فى الطيارة وهما راجعين من الأجازة.

-(مروة) اتقدملها عريس ووافقت عليه.

-(دنيا) دخلت كلية فنون جميلة وقررت إنها تنسى (ب) وتعيش حياتها وتبدأ قصة حب جديدة مع زميل جديد ليها

-المفاجأة التانية إن (ج) طلع هو نفسه (ب) فى مرحلة المراهقة وبعد ما عمل العملية فضل مكتئب وبعد كدة قرر إنه يتعلم الرسم لغاية ما بقى رسام موهوب. 

-المفاجأة التالتة إن (ج) هو نفسه (أ) وإنه اتجوز (علا) فعلاً وبعدين اتطلقوا بعد ما بنتهم (رؤى)ماتت لغاية ما حب (رؤى) ومات.

-رواية خطيييييييييييييييييييييرة . 

 

محمد صادق

-محمد صادق-والعهدة على موقع (جود ريدز)-كاتب شاب من مواليد أبريل 1987 يعنى أكبر من بأقل من سنة واحدة يعنى دفعة واحدة.

-بيقوللك كمان إن أول رواية من تأليفه هى رواية (طه الغريب9) وتانى رواية هى (بضع ساعات فى يوم ما) ودى اشتريتها ب 25 جنيه من المكتبة ويا رب ما تطلعش فلوس مرمية فى الأرض وتالت رواية هى رواية(هيبتا) اللى حقراها دلوقت-إن اء الله واللى خلتنى أدورعليه.

-لقيتله صفحة عالفيسبوك دخلت لقيته متصور مع ناس بيمضيلهم رواياته ولقيته طويل وحالق شعره زيرو وعامل دوجلاس والناس اللى معاه معظمهم-أو كلهم-شباب.

-إيده الشمال فيها دبلة وواضح إنه متجوز.

-لقيت معاه ناس متصورة مسيحيين وواحدة منقبة وواحد ملتحى وعرفت فعلاً قد إيه الثقافة ممكن تكون هى الجسر اللى بيجمعنا مع بعض حتى لو اختلفنا فى المظهر أو فى الدين او فى أى حاجة.

-المهم أن شفت الصور اللى هو متصورها فى (حفلا توقيع الكتب) وقلت يمكن فى يوم من الأيام أبقى كاتب كبير وأعمل حفلات توقيع يحضروها ناس كتير وكتبى تتحمل عالنت وأعوم على وش الفتة.

أحسن حاجة لما تدور على موضوع تدور عليه فى المدونات بتبقى النتايج محكومة أكتر من الصفحة الرئيسية.

-رواية (هيبتا)مشاركة فى معرض القاهرة الدولى للكتاب 2014 فى دورته الخامسة والأربعين.

-بيقوللك إن "محمد صادق"اشتغل فى مجلة "كلمتنا"أربع سنين-بالمناسبة مجلة "كلمتنا"-مجلة شبابية جميلة جداً وتستحق المتابعة-وهو اللى كان مسئول عن باب الأدب فى المجلة لمدة 3 سنين.

-يلا نشوف (هيبتا) مع بعض.

قلسقة التدوين

-فلسفة التدوين -زى ما أنا فاهمها-إن دى مساحة عشان أنا أكتب فيها اللى أنا عايزه بالطريقة اللى أنا عايزها فى الوقت اللى أنا عايزه إن شاالله أكتب (ريان يا فجل) أو أكتب تدوينة من سطر واحد أو أكتب تدوينة من 10 صفحات.

-(أنا حر ما لم أضر) هى القاعدة الأولى هنا والقاعدة التانية هى (حد ليه شوق فى حاجة؟).

-عزيزى القارئ أنا بحترمك فعلاً بس فى الآخر دى مدونتى وانت فى ايدك الريموت...قصدى الماوس اللى يعجبك يبقى خير وبركة واللى تختلف معاه يبقى برضه خير وبركة.

-اكتب يمكن كلمتك توصل لحد بعد 2000 سنة وتخليه يبتسم ويقول (الله يرحم اللى كتب التدوينة دى).

رواية (وحدى مع لافكرافت)

-الرواية رقم (60) من سلسلة روايات (فانتازيا) للكاتب المبدع والمتألق الدكتور (أحمد خالد توفيق).

-(فانتازيا) باختصار للى متابعش السلسلة قبل كدة من بطولة (عبير عبد الرحمن)البنت اللى مفيش أى حاجة بتميزها فهى جمالها عادى وأسرتها فقيرة بس ميزتها-اللى خلتها بطلة السلسلة-إن خيالها خصب بدرجة رهيبة وتقدر تتخيل أى حاجة بتقراها كأنها عايشة جواها وفى جهاز ابتكره جوزها المهندس (شريف) عن طريقه بتقدر تروح عالم الأحلام وتقابل هناك (المرشد)اللى بيكون دليلها عشان تدخل العالم اللى هيا عايزاه.

-الرواية المرادى بتدور فى عالم سيد أدب الرعب بعد (إدجار آلان بو)وهو (لافكرافت)اللى قدر يبتكر عوالم سوداوية ويجر الناس ليها ويجر (عبير)ليها واحنا معاها.

-عبير راحت تقابل (لافكرافت)نفسه فى مصحة (أرخام)اللى كان جواها ومشغول بتأليف قصص الرعب .

-صحيت عبير ولقت نفسها بتطلع من نقرة لدحديرة ومن فخ لفخ على رأى (ثلاثى أضواء المسرح).

-حنقابل فى الرواية عوال القتل مع تمزيق الجثث...عوالم أكلة لحوم البشر.

-عبير لقت الجرايم كترت وكلها شايلة الطابع الكابوسى لعوالم لافكرافت فظنت إنها هى اللى مسئولة بشكل و بآخر عن الجرائم دى.

-حاولت إنها تدخل السجن -عشان متعملش جرايم تانية-فخطفت بندقية عسكرى بس لقيوا شكلها غلبانة فطردوها برة القسم.

-بيقوللك إن زمان كنت بتحكم الأرض كيانات عملاقة وبعدين اختفت وهما لسة موجودين بس مستنيين نداء كاهنهم (كتولو) عشان يرجعوا الأرض ويملوها بالجنون ويخلوا الناس تقتل فى بعضها وده كله من وحى خيال (لافكرافت).

-من رحمة الله عز وجل بنا عجز العقل البشرىعن استيعاب كل محتويات الكون.نحن نعيش فوق جزيرة هادئة من الجهل وسط بحار سود من اللانهاية ولم نخلق لنبحر بعيداً.لم تستطع العلوم إلا أن تؤذينا قليلاً لكن يوماً ما سوف تتمع قطع المعرفة المتناثرة وتفتح آفاقاً جديدة من الحقيقة...عندها سوف نجنمن هول الاكتشاف .أو نفر من النورإلى السلام والأمان فى عصر مظلم جديد.....ه.ب.لافكرافت.

-مع الوقت بدأت تظهر مخلوقات غريبة هى مزيج من البشر والكائنات البحرية من عالم (لافكرافت) فى أوتوبيس وفى النهاية بيعمل سائق الأوتوبيس حادثة وبيموت .

-حنلاقى الشخص اللى حاول يجمع تاريخ وشجرة عائلته وكان عارف إن أى حد حاول يجمع شجرة العائلة من أجداده كان بينتحر فى النهاية وفى النهاية انتحر هو نفسه. 

-حنلاقى جزيرة ظهرت فى وسط المحيط فجأة وسببت موجة كبيرة وغرق مدن ساحلية وبعد كدة بعثة رايحة تكتشف الجزيرة يلاقوا كائن إخطبوطى عملاق وهو فى الأصل كائن فضائى اسمه (كتولو) كان ساكن فى أعماق المحيط وبعدين ظهر للحياة عشان يسيطر على العالم وبعتله الأمريكان طيارات وقاذفات كسرها كلها فقرروا يضربوه بالقنابل النووية وهنا قررت (عبير) أن تعود إلى (فانتازيا) لمقابلة (لافكرافت) مرة أخرى.

-راحت (عبير) عشان تقابل(لافرافت)وحكتله إن (كتولو)حيدمر البشرية فى العالم الحقيقى وإنه لازم يلاقيله حل فقالها إن (كتولو) مش من تأليفه لكنه كائن موجود وهو مجرد كتب عنه بس وإنه حييجى معاها ويحاول يفكر فى حل.

-راح (لافكرافت) ومارس فنون السحر و (النكرومانسى) واستعاد البارون (فيرنكزى) من العصور الوسطى وهو ساحر عظيم القدرات عشان يساعده فى السيطرة على (كتولو).

-"الخوف هو أقدم وأقوى عاطفة عرفها الإنسان وأقوى أنواع الخوف هو الخوف من المجهول"ه.ب.لافكرافت.

-فى النهاية تستيقظ (عبير) لتجد أنها ما زالت فى (فانتازيا)وأن ما مرت به عبارة عن كابوس طويل جداً.

لافكرافت

-بيقوللك يا سيدى (لافكرافت)ده كان كاتب روايات رعب وخيال علمى وجنسيته أمريكى وبيقوللك إنه مكملش تعليمه عشان كان مريض بس علم نفسه بنفسه من خلال القراءة زى (العقاد)عندنا.

-اسمه ه.ب.لافكرافت أو هوارد فيليبس لافكرافت (حلوة طريقة كتابة حروف من الاسم بعد كدة اسم العية اللى بيشتهر بيه الإنسان بعد كدة).

-اتوفى عن 47 سنة مريضاً بالسرطان(عافانا الله وإياكم).

أسطورة الأساطير 1

-(أسطورة الأساطير) هو الاسم الذى اختاره المبدع الدكتور (أحمد خالد توفيق) للرواية الأخيرة من السلسلة الرائعة (ما وراء الطبيعة) التى عشنا معها وعاشت معنا طوال أكثر من 20 عاماً وقد قرر أن يقسمها على جزئين (أسطورة الأساطير1) و(أسطورة الأساطير2).

-الدكتور (رفعت اسماعيل) أستاذ أمراض الدم المتقاعد وهاوى الأشباح ومصاصى الدماء وكل ما يتعلق بعالم (ما وراء الطبيعة) بيحكيلنا ازاى إنه أصيب ب (سرطان الحنجرة) (عافانا الله وإياكم) وإنه كان بيحكيلنا الروايات اللى فاتت كلها وهو مصاب بهذا الداء اللعين.

-(ماجى ماكيلوب) حب رفعت الأول والأخير جات من اسكتلندا عشان تكون مع رفعت فى أيامه الأخيرة.

-أسلوب جديد فى الرواية وهو اختيار حروف اسم (رفعت اسماعيل) لمجموعة من القصص القصيرة نسى رفعت يحكيهالنا قبل كدة.

-حرف الراء و قصة (رسالة من الكينونة) اللى هى كيان غامض مش عارفين ايه هو بالظبط لكنه بيساعد رفعت بشوية ألغاز بتديهومله فى رسالة وهو بيحلهم وينقذ نفسه.

-حرف الفاء وقصة (فى المثلث) قصة عن لغز (مثلث برمودا) الشهير وكانت بصحبة (ماجى) وفسر رفعت الأمر بأن المثلث هو فجوة من فجوات (جانب النجوم) وأن المسوخ هى التى تحطم السفن والطائرات المارة.

-حرف العين وقصة (عزت والنحات)قصة عن نحات سفاح يقتل الضحايا ويستخدمهم لصنع تماثيل مستخدماً السحر الأسود .

-حرف التاء وقصة (ترنيمة المزييرة) والمزييرة وهى كائن يشبه (النداهة) ولكنه يوجد فى المياه مثل (عرائس البحر) ويلتهم الشباب ليلاً.

-حرف الألف وقصة (أسرتنا) ينفتح من جديد لغز (د.ريتشارد كامنجز) ومصاصى الدماء وفى النهاية نوضع فى لغز جديد....هل القصة حقيقية أم خدعة؟

-حرف السين وقصة (سر الزنزانة)  يقرر الدكتور رفعت فجأة أن يحكى لنا قصة (خريولسن) التى وعدنا بها ثم يحدث ما يقاطعه كالعادة.

-شخص يبعت جواب للدكتور رفعت ويعرض عليه (النجاة من مرض السرطان)مقابل الكتاب اللى بيحمى دكتور رفعت من (دكتور لوسيفر).

-البقية فى الجزء القادم والذى سيحمل رقم 80-2 (أسطورة الأساطير 2).

-مستوى الرواية رائع ولكنه فى المستوى القصصى العادى بتاع الدكتور (أحمد خالد توفيق) ومش هو الحاجة اللى تليق بنهاية سلسلة زى (ما وراء الطبيعة).

إذن فليمت قيصر

-يوليوس قيصر كان فاكرإن الشعب بيحبه والناس كلها معاه لغاية ما جاتله الخيانة من أقرب الناس ليه بس الضربة اللى وجعته فعلاً كانت ضربة (بروتوس) لأنه مكانش متوقعها وقال (حتى أنت يا بروتوس...إذن فليمت قيصر).

-كلنا عارفين إن موازين الدنيا اختلفت وإن الناس بيفضلوا كويسين معاك لغاية ما يكون فى بينكم (تعارض مصالح) ساعتها بيقلبوا وحوش .

-الغريبة إننا بنستغرب ونذهل لما نلاقى الخيانة بأشكالها المتعددة بداية من أبسط أشكالها اللى بنسميها (دقة نقص) ونلاقيها جاتنا من ناس مكناش متوقعينها منهم.

-المثل الشعبى البسيط طول عمره بيقول (حرص ولا تخون) يعنى اتوقع من الناس الأوحش حتى يثبت العكس لأن الصدمة فى أشخاص معينين بتفقدنا الثقة فى كل الناس بعد كدة وعلى رأى (سعاد حسنى) فى فيلم (صغيرة على الحب) (بقى هى الدنيا كدة..بقى هما اناس كدة...يا خسارة ضحكتى...يا خسارة فرحتى).

-تفتح الفيس أو تويتر تلاقى الناس كلهم ملايكة وصحابهم وقرايبهم بيخونوهم.

-تسمع أغانى تلاقى الخيانة رايحة جاية والخونة أكتر من الهم عالقلب.

-تتفرج عالمسلسلات والأفلام تلاقى الخيانة للركب.

-خياااااااااااااااااااااااانة !

أرذل العمر

-بستغرب قوى لما ألاقى حد تسأله نفسك فى ايه يقوللك نفسى أعيش عمر أطول أو واحد بيقول للتانى (ربنا يديك طولة العمر) وكأن المسألة فى الحياة هى طولها أو قصرها واستغربت أكتر على (أحمد حلمى) فى فيلم (ألف مبروك) لما اتسأل (نفسك فى ايه) قاللها (نفسى أعيش لغاية ما يبقى عندى 100 سنة).

-يا جماعة أنا من وجهة نظرى إن المهم فى الحياة مش طولها أو قصرها المهم فيها لحظات السعادة والصحة وراحة البال وهو ده العمر الحقيقى للإنسان.

-طولة العمر من وجهة نظرى معناها إن الإنسان يصاب بأمراض مكانش يتخيل مجرد إنه يسمع اسمها.

-طولة العمر معناها إن الإنسان يتحمل مصايب وأحزان أكتر وأكتر.

-طولة العمر معناها إنك تتحمل فراق أحبابك وأهلك قدام عينيك لما يموتوا وتدفنهم بنفسك.

-طولة العمر معناها إنك تبقى تقيل وعالة على مراتك وولادك ويتمنوا اليوم اللى ربنا يريحك ويريحهم من همك.

-عايز تتمنى لحد حاجة اتمناله السعادة وراحة البال والفرحة مش (طولة العمر).

"كل ده كان ليه"يا أستاذ"عمر خيرت"؟!

-مقطوعة موسيقية سمعتها وعجبتنى واكتشفت إنها من إبداعات الفنان المبدع دائماً المايسترو"عمر خيرت".

-المزيكا تقدر تقول إنها سحرية تسمعها من هنا وهوبا تبقى مش هنا وتسرح مع الذكريات والأحلام.

-فضلت مقتنع إن المزيكا للمبدع"عمر خيرت".

-المزيكا من كتر ما عجبتنى خليتها هى (الخلفية الموسيقية)اللى بشغلها كل ما آجى أقرأ كتاب أو رواية وكأنها هى الوقود بتاع الطيارة اللى حطير معاها ومع الرواية أو الكتاب لعالم آخر.

-إذ فجأة الجماعة عندى فى البيت كانوا مشغلين برناج(أراب أيدول) وألاقيلك (محمد عساف) وهو (عبقرى آخر)على رأى العبقرى التالت (أحمد خالد توفيق) ولقيتلك (محمد عساف) بيغنى (كل ده كان لييييه..لما شفت عينيه)وبعدين يقول (اللى سهرنى تارراتا واللى حيرنى تارراتا واللى فاتنى فى حال....نام وسهرنى تاررتا واللا فاكرنى تاررتا واللا مش عالبال) والمزيكا شدتنى من ودانى وسألت الجماعة فى البيت (إيه ده هى المزيكا دى مش بتاعة عمر خيرت؟)قالولى لأ دى أغنية (كل ده كان ليه) لموسيقار الأجيال(محمد عبد الوهاب).

-دخلت عالنت وجبت أغنية عبد الوهاب ولقيت فن وابداع لامتناهى فى الأغنية والمزيكا وصوت عبد الوهاب .

-لا شك إن (عمر خيرت)حط التاتش بتاعه فى اللحن وخلاه له طعم تانى لكن برضه مزيكا عبد الوهاب ليها رونقها الخاص.

-وأخيراً على رأى (منير مراد) (محدش شاف عبد الوهاب...محدش شااااااااااااااف....محدش شااااااااااااف).

الموسيقى كخلفية للقراءة

-عمرك جربت قبل كدة إنك تقرا كتاب ممتع أو رواية جميلة وانت مشغل خلفية موسيقية؟!

-الخلفية الموسيقية لاى موسيقى هادية بتبقى بالنسبالى بمثابة تهيئة الجو الملائم للقراءة خاصة إنى بحب (القراءة الإلكترونية)من شاشة الكومبيوتر.

-لما أحط السماعات فى ودانى ببقى حاسس كانى فى المطار وركبت الطيارة وسامع المضيفة بتقول(على السادة القراء ربط السماعات استعداداً للإقلاع مع الكتاب).

-بتشغل المزيكا وتنفصل عن العالم المحيط وتعيش بعقلك وكيانك مع الكتاب.

-هااااااااااااااااااااااااااااح.

مسرحية(رد قرضى)

-مسرحية(رد قرضى) مسرحية من انتاج 1999 واتعرضت فى التليفزيون 2004 بطولة (أشرف عبد الباقى)أبو دم خفيف جداً(كان عنده وقتها 36 سنة)و(محمد سعد)أبو دم خفيف وموهبة كبيرة بس هو مضيعها فى تفاهات (كان عنده 31 سنة) و(ياسمين عبد العزيز)اللى كانت رفيعة جداًجداً فى المسرحية دى(يا دوب كتكوتة صغيرة عندها 19 سنة)و(شريف منير)اللى أثبت وجوده دايماً فى دور البطل التانى فى المسرحيات(كان عنده 39 سنة)وممكن أقول عن دوره فى المسرحيات (متلقى الإفيهات)اللى بطل المسرحية بيقوله الإفيه وهو بيبرز الإفيه أو بيتلقاه.

(من أجل الشيطان) 2

-( غرفة الانتظار) هو اسم القصة الثانية من مجموعة (من أجل الشيطان) للكاتب (عمرو الجندى).

-الاسم بيوحى إن فى قاعة انتظار بعدها شئ مجهول وبيقوللك فى المقدمة إن اللى فى الغرفة هما (أنا وانت والشيطان) والموت مش حياخدك منى.

-بيناقش فى الأول فكرة (الانتقام) وهلى هى فكرة مشروعة واللا الأفضل ننتظر(عدالة السماء) يعنى لو حد قتل حد عزيز عليك تنتقم عشان(الفراغ )اللى سببه ليك القاتل بقتل القتيل عندك.

-شخص جديد رايح غرفة الانتظار بعد ما مات أبوه بس سابله هدية عشان تفكره باللى راح (فكرة وجود لينك بين الهدايا والناس الى غايبة وبتخليهم ييجوا على بالنا أول ما نشوف الهدية).

-نوع جديد من الانتظار وهو انتظار قدوم المسافرين أو الغائبين وهو نوع قاسى آخر من الانتظار يتناسب طرديأ مع مقدار غلاء الشخص المنتظر لدينا.

-انتظار الناس اللى ماتوا وسابونا لوحدنا نوع تانى من الانتظار إننا نلحق بيهم فى يوم من الأيام وكل ما الدنيا تنسينا نلاقى ذكرى تفكرنا بيهم زى مكان كنا فيه مع بعض أو حاجة مشتركة كانت بيننا أو حاجة تفكرنا إننا حنفضل على طول فى (غرفة الانتظار).

-مستوى القصة متوسط بس الفكرة جميلة.

المجموعة القصصية (من أجل الشبطان)

-مبدئياً المجموعة القصصية (من أجل الشيطان) من تأليف الكاتب المصرى (عمرو الجندى) ولما دورت على الأستاذ عمرو على الانترنت عشان أتعرف عليه كأصحاب يعنى على أساس إنى حأطلع على شوية من أفكاره وحيبقى فى لينك ما بيننا ولو لفترة مؤقتة لقيت شاب من مواليد 83 يعنى ما هواش عجوز ولا حاجة فاستبشرت خير لان مصر فى الفترة الأخيرة بقى فيها مواهب شبابية كتير فى مجال الرواية والأدب زى (أحمد مراد)وغيره.

-لقيت عمرو الجندى خريج تجارة وكمل دراسة فى الجامعة الأمريكية ودرس الأدب الإنجليزى من إنجلترا (أونلاين)...ابقوا فكرونى أدرس أونلاين لما افضى.

-رحت اشتريت الرواية ب25 جنيه ودعيت انه ميبقوش فلوس اترمت فى الأرض وعملت ناصح وبصيت فى أول صفحة بعد الغلاف عشان أشوفها جديدة واللا قديمة فى رقم الإيداع فى أول صفحة على يمينك بعد الغلاف لقيت 2014 قلت دى حاجة حديثة واكتشفت بعد كدة ومع البحث انها صدرت الطبعة الأولى بتاعتها فى 2010 واللى معايا دى الطبعة التالتة.

-قلت أدخل أشوف رأى الناس فيها ايه لقيت فى (جود ريدز) كذا حد معجبتهمش المجموعة وبيقولوا إن الكاتب بيسرف فى التشبيهات والجمل اللى فيها فزلكة على حساب المضمون والمعنى (يا خراب بيتك يا صابر ويا خسارة ال25 جنيه).

-دخلت على تويتر لقيت واحد بيقول (محدش يشترى الرواية وخسارة ال15 جنيه اللى دفعتهم فيها)...يعنى أن اتنصب عليا فى 10 جنيه.

-مبدئياً الغلاف شكله جذاب من تصميم (أسامة علام) واحد وشه مش باين وبيربط كرافتة سودا وتحته واحد شكله خايف وكمان اسم المجموعة (من أجل الشيطان) يوحيلك إن المجموعة قصص رعب لكن الناس بتقول إنها طلعت قصص اجتماعية ونفسية...لما نشوف.

-دى مقدمة مبدئية كدة قبل ما أمشى مع الأستاذ عمرو ويحكيلى القصة وأنا بدورى أقولكم انطباعاتى عن كل واحدة من القصص التمانية الموجودة فى المجموعة فإلى اللقاء.

أغنية (حلاوة روح)

-يمكن يكون اختيار (حكيم) لغناء الأغنية ليه أكبر دور فى نجاح الأغنية.

-حكيم صوت شعبى قوى وسميعة الأغانى الشعبى يقدروا يعرفوا حجم ومساحة صوت حكيم فى الشعبى بعيداً عن البروباجاندا اللى ممكن تظلم ناس على حساب ناس.

-الأغنية بتبدأ بالموال الهادى اللى بيبان فيه المغنى الحقيقى من المغنى (النص لبة).

-حلو قوى حرف الهاء عند حكيم اللى بيعتبر من مميزاته عن مغنيين تانى كتير وبيبان فى الآه اللى فى أول الأغنية.

-بتبدأ الأغنية بحقيقة كلنا عارفينها بس بنطنشها زى حاجات تانية كتير فى حياتنا وهى إن جمال الروح أهم من جمال الشكل والجسد لكن لأننا سطحيين وبنحكم بالمظاهر أكتر من الجواهر (مع الاعتذار لجواهر) فاحنا بنحكم بالشكليات.

-حاجة تانية بيقررها حكيم فى الأغنية هى إن الإنسان ممكن يكون محسود على حاجة وتكون هى السبب فى شقاؤه زى الجمال اللى هو نعمة كبيرة للست خصوصاً لكن مش كل الجميلات سعداء واسألوا (مارلين مونرو).

-الجمال مهما كان حياخد يومينه ويزول وكذلك المال والسلطة والقوة وكل حاجة فى الدنيا الدوارة اللى احنا عايشين فيها.

-بعد الموال بيدخل حكيم فى المساحة اللى فيها المزيكا الجامدة اللى بترقص الناس.

-مع قوة المزيكا مخدناش بالنا ان كلمة (تبين)اتكررت مرتين مرة فى (بكرة الأيام تبين) ومرة فى (لما الأيام تبين) لكن المزيكا القوية مخلتناش نحس بده لأن تكرار نفس الكلمة فى الكوبليه بيضعف المعنى.

-حتة الموجة هى أجمل كوبليه فى الأغنية بالنسبالى (عايم والموجة عالية ..والموج عالى عليا..بتشيل وتحط فيا...والكل جاى عليا).

-حتة حزينة شوية (أنا اللى عشت ليهم...وكنت بخاف عليهم....نسونى حتى اسمى....مش حبقى خلاص عليهم) وبعد كدة بيطلع  فجأة بحتة (أنا اللى بكرة هبقى).

-حتى شيوعية كدة (يا ما ناس تلاقى النعمة  عالأرض بتدوسها وناس غلابة تلم النعمة من عالأرض وتدوسها).

-بابا يا بابا يا بابا والمزيكا اللى ترقصك حتى لو كنت فين حتى لو فى خيالك بتلاقى نفسك بتتخيل نفسك بترقص مع الأغنية.

-حتة (يا عبسلام) فكرة موفقة وعلقت مع الناس جامد.

-بعد كدة بيحط حكيم حتة زيادة عشان يفكر الناس إن الأغنية معمولة للفيلم وبيكرر كلمة (حلاوة)تلتميت مرة فى الكوبليه.

-قولووووووووووووو بقااااااااااااااااااااااا.

-بالنسبة للكليب أوحش حاجة فيه هى هيفاء وهبى وأحلى حاجة فيه واللى اداله حيوية هو حكيم بخفة دمه اللى اتعودنا عليها.

كتاب (مبادئ الفلسفة)

                                  كتاب (مبادئ الفلسفة)

-كتاب من تأليف ا.س.رابوبرت وترجمة الأستاذ محمد أمين.

-أنا برضه بالنسبالى موضوع الفلسفة موضوع تقيل و (دسم) بس أسلوب الكتاب سهل وسلس ومنظم وبيديلك معلومات جميلة بكل سهولة ويعتبر (مدخل لعم الفلسفة) للمبتدئين من أمثالى.

-من المعلومات الجديدة اللى عرفتها إن فى علم مستقل بذاته اسمه (علم الجمال) وهو فرع من فروع علم النفس اللى هى فرع من فروع الفلسفة.

-هل علم الجمال مرتبط بالأخلاق؟..اختلف العلماء فمنهم اللى شايف إن الفن لازم يكون أخلاقى وبس ومنهم اللى شايف إن المهم هو جنال الشكل بغض النظر عن المضمون (حتى لو كان جريمة)ومنهم اللى شايف إن علم الجمال فوق الأخلاق يعنى إن حاسة تذوق الألوان أهم للرقى البشرى من ادراك الخير والشر.

-أفلاطون كان رأيه إن احنا كنا بنتمتع بالجمال الأزلى قبل ما تحل أرواحنا فى الأجسام عشان كدة كل ما نشوف شئ جميل بتاخدنا (الروعة) عشان بنفتكر اللى كنا فيه.

-العلماء فى العصر الحديث خالفوا رأى أفلاطون وقالوا إن الجمال مش بيبقى نابع من الشئ لكن نابع من إحساسنا إحنا بالشئ وإلا كان حيبقى الجمال مطلق مش نسبى بالنسبة لكل الناس.

-علم الأخلاق !

-بيقوللك إن علم الأخلاق هو العلم اللى بيبحث فى الحاجات اللى المفروض يكون عليها الإنسان بمعنى إن كل عمل من الأعمال لازم يكون ليه غرض أو مقصد وعلم الأخلاق بيهتم بالمقاصد من الأعمال وإنها تكون موجهة لشئ صالح.

-بيقوللك إن البوصلة اللى بتوجه الإنسان لاعمال معينة اسمها (الوجدان) وهى يا إما بتبقى غريزة فى الإنسان يا إما ناشئة من المعتقدات الدينية يا إما ناشئة من العرف والعادات والتقاليد.

                                       فيلم ترانسبورتر 2

-فيلم لنجم أفلام الأكشن جايسون ستاثام.

-منظر العربية جامد جداً لدرجة إنك ممكن تعتبر الفيلم دعاية للعربية اللى مرضيتش تدور لما الحرامية ركبوها لأنها مقفولة برقم سرى....شئ مذهل.

-بنت صغيرة شغالة مع عصابة وواضح إنها كانت طمعانة فى قرشين بس جايسون قام معاهم بالواجب وروقهم وفى الآخر كل اللى ضايقه إنه اتأخر على ميعاده (احترام المواعيد).

-قرص على نفسه عشان يوصل فى ميعاده بالظبط (احترام المواعيد تانى).

-أول ما الجرس ضرب الساعة تلاتة العيال ما صدقت وطالعين يجروا (ما بيصدقوا الدراسة تخلص زيينا).

-جايسون خايف على العربية زى ما تكون عيل من عياله لدرجة انه ما استحملش لما العيال حكوهاله.

-الواد ركب العربية ومخه فى اللعبة بس جايسون محفظه قواعد ركوب العربية فى الأول لازم يحترم العربية ولازم يحيي السواق (عندنا الواحد بيركب الميكروباص وهو عليه غضب ربنا ومش طايق دبان وشه وبيرزع الباب طررررررراااااااخ...بس أنا لو أبويا كان باعتلى عربية زى دى عشان تجيبنى من المدرسة كنت حبقى طفل مطيع زى اللى فى الفيلم).

-عندهم حزام الأمان معمول عشان يربطوه وهما قاعدين لزوم الأمان لكن عندنا الحزام محطوط عشان متاخدش مخالفة.

-جايسون لابس جاونتى وهو بيسوق(خايف على الدركسيون بتاع العربية ليتوسخ من البصمات).

-الواد عندهم حرس خاص من اللى بيلبسوا سماعات فى ودنهم وبيلبسوا بدل (شكلهم أغنيا).

-جايسون خاف على الولد لحسن يشوف أبوه وأمه بيتخانقوا(شكله بيحب الولد وبيأدى واجبه بما يرضى الله).

-الواد حفظ الفزورة زى التكس وراح راصصها لأمه كانه بيسمع قصيدة (قطتى صغيرة)عندنا.

-أم الولد تناست إنها كانت من شوية بتتخانق مع جوزها واندمجت فى الفزورة عشان متنكدش على ابنها(لازم نفصل يا جماعة عشان منظلمش ناس بذنب ناس).

-حلوة شغلانة السائق المحترف دى ...ابقوا فكرونى أتعلم السواقة.

-اللى عنده مشكلة بيحاول يدور على أى حد يفضفض معاه بدل ما يطق عشان كدة أم الولد قعدت تحكى قصة حياتها لفرانك (جايسون ستاثام).

-جوزها لقاها بتتمرقع مع السواق فقالها يلا عايزين نكمل الخناقة.

-الراجل محترمها وبيقوللها يا مدام وهى مصرة إنه يناديها باسمها مجرد كأنهم أصحاب....متحترمى نفسك وعلى رأى توفيق عكاشة (يا ولية عيب ) !

-زعيم المجرمين كان لابس أبيض فى أبيض وروق الناس اللى كانوا بيقاتلوه وطرقعلهم كلهم وشكله جامد جدى.

-الولية جاتله لحد البيت وهى سكرانة (يا منجى الوحش من الجحش) !

-يا ترى فرانك بياخد كام فى المشوار على البدل اللى هو بيلبسها وعالعربية الفخيمة دى؟!

-البت أم شعر أصفر موتت الممرضة الغلبانة والدكتور الغلبان بدم بارد.

-عندهم اسم الدكتور بيبقى مكتوب بالخيط على البالطو (وعندنا الدكتور يقول الحمد لله لو لقى بالطو يلبسه)....الله يرحمك يا خالتى.

-فرانك عمللها قنبلة من أنبوبة الأكسجين فى ثانية ...شكله دخل الجيش (الجيش بيقوللك اتصرف).

-هى خزنة الرصاص بتاع مسدسها مبتخلصش واللا ايه؟!

-حطوله قنبلة فى العربية....يا خسارة العربية.

-هى كمان العربية طلعت مضادة للرصاص؟!

-أحلى حاجة إن الأجانب بيجهزوا دايماً خطة بديلة....يا ريت نتعلم احنا كمان اننا نعمل خطة بديلة (أو بلان B).

-انتظرونا فى المقال القادم لاستكمال الأستوديو التحليلى.

                                                 خمور سقارة

-بيقوللك عاملين خمور ومسميينها سقارة....يعنى حبكت وملقيتوش غير أسماء الآثار والمناطق الأثرية وتسموا بيها الخمور؟

-ومسميين السجاير (كليوباترا) والشعب مسميينها (كوكو الضعيف) ...يعنى كليوباترا بقى اسمها كوكو...الله يرحم (مارك أنطونيو) لو كان عايش كان علقنا عالخوازيق بالعرض !

-الشعب تعبان صحيح والظروف نحو الأسوأ صحيح بس مش لدرجة نشرب خمرة وحشيش ...ما هواش ده الحل ولو كان الحل فى الهروب المؤقت من المشاكل بالسكر يبقى النوم أحسن وأهو (هروب مجانى مؤقت) من المشاكل ومن هموم العيشة كلها !

كارثة الطلاق !

مشكلة الطلاق فى ظل عدم وجود أولاد-مع صعوبتها وألمها النفسى العميق على المرأة خاصة-تهون لأنها كأى مصيبة أخرى تأخذ وقتها من الحزن وتذهب إلى حال سبيلها بالرغم من ظلالها القاتمة التى تقع-غالباً-على المطلقة .

ولكن إذا كان هناك أولاد فالمصيبة اعظم وأخطر لأن الأولاد ينشأون مشتتين وتربيتهم تكون متطرفة فإما تدليل لدرجة الإفساد لو تربى الطفل مع الأم أو قسوة لدرجة الإفساد أيضاً لو تربى مع الأب لأن التوازن الأسرى يعنى وجود الأم بحنانها والأب بحزمه ليحدث التوازن المطلوب لتربية الطفل تربية سوية !

رجاء من الآباء المحاولة بكل الطرق أن يسووا خلافاتهم قبل ان يجنوا على أطفالهم !

أنا وأفلام السكس !

أنا وأفلام السكس !

مشكلتى ومشكلة معظم الشباب هى -بكل صراحة-مشاهدة أفلام السكس والتفاعل معها

بالعادة السرية التى أعلم تماماً أخطارها وبرغم ذلك لا أستطيع التوقف عنها .

أصبح من السهل الآن -فى عصر ثورة المعلومات-أن تحمل ما تشاء فى الوقت الذى تشاء خاصة وأن غالبية الشباب لديهم حاسوب شخصى غير مراقب وإذا قررت أن تتوب وتعتدل لا تلبث أن تجد ما يثيرك فى التلفاز أو فى الشارع أو تسمع الأغانى المسفة فى المواصلات أو تتحدث مع أحد أصدقائك فيأتى ذكر هذا الموضوع فى الحديث فتثار شهوتك من جديد وتعود كما كنت !

فما الحلول العملية-من وجهة نظركم-لهذه المعضلة؟