جشع

-هوايتى الرئيسية هى تحميل وقراءة الكتب الاكترونية ولكن المشكلة الكبرى هى فى الجشع والطمع وإضاعة الكثير من الوقت فى محاولة تحميل أكبر قدر ممكن من الكتب تطبيقاً لنظرية "أبو بلاش كتر منه" حتى أن وقت الفراغ يضيع كله فى محاولة البحث عن أحدث وأندر العناوين ولا يتبقى وقت كافى للقراءة ويستمر الدوران فى هذه الحلقة المفرغة.

-الجشع والطمع هو داء البشرية المستمر.

-بعد اذنكوا عشان أروح أدور على كام كتاب أحملهم وملحقش أقراهم.

أحمد سعد

-يا جماعة اللى مسمعش (أحمد سعد) وهو بيغنى فاته كتير...صوت قوى وتمكن غير عادى.

- تتر مسلسل (مملكة الجبل) بطولة أخوه (عمرو سعد).

-(أنا رحت القلعة) من كلمات المبدع (أحمد فؤا نجم)الله يرحمه.

-أغنية (مش باقى منى) من كلمات الرائع (جمال بخيت).

عبد الوهاب المسيرى

-اتعرفت على اسم (عبد الوهاب المسيرى) من خلال قراءتى لكتاب (مصر الكبرى) ل (أحمد المسلمانى) ونصيحته فى أحد المقالات باقتناء كتاب (حياتى الفكرية البذور والجذور والثمار) ل (عبد الوهاب المسيرى).

فيلم (قراصنة الكاريبى)

-اتفرجت على الأجزاء الثلاثة الأولى من فيلم (قراصنة الكاريبى) حاجة روعة بصراحة وحسيت إن الزمن انتقل بيا للعصور الوسطى وحسيت المكان انتقل بيا للبحار والمحيطات وجزر الكاريبى.
-كابتن (جاك سبارو) أو النجم (جونى ديب) كان هو البونبوناية بتاعة الفيلم.
-ويل تيرنر أو (أورلاندو بلوم) كان أداؤه رائع.
-كابتن بابوسا واليزابيث سوان وبنتل وراجيتى وديفى جونز و و و و.
-الخلاصة رووووووووووووووعة .

رواية (قلعة السفاحين)

-الرواية رقم (22) من سلسلة روايات (فانتازيا) للكاتب المبدع (أحمد خالد توفيق).

-اتنشرت عن (المؤسسة العربية الحديثة) فى يناير سنة 2003 يعنى الدكتور (أحمد) كان عمره حوالى 41 سنة.

-الاسم (قلعة السفاحين) بيدل على إن فى سفاحين والسفاحين دول موجودين فى قلعة يعنى البطل المرادى هو المكان...تعالوا بقى نوف إيه اللى بيحصل جوة القلعة دى.

-افنكرت النكتة القديمة بتاعة (مرة واحد راح القلعة لقاها لابسة).

-صورة الغلاف اللى رسمها الأستاذ (إسماعيل دياب) الله يرحمه فيها أميرة جميلة وشايلة خنجر عليه دم وشكلها خايف وفيها واحد غنى-يمكن يكون ملك-وبرضه خايف وفيها ناس لابسين اسود واضح إنهم السفاحين.

-افتكرت برضه (زينة) فى فيلم (الشبح) لما قالت ل (أحمد عز) (هو انت السفاح؟!).

-الغلاف الأخير بيورينا إن القلعة فى (خراسان) وإن فى مجموعة اسمها (الفداوية) وإن الشاعر (عمر الخيام) موجود معاهم وإن الفترة دى من الفترات الخطيرة فى التاريخ.

ماستر بيس

-خلى بالكوا إن أى عمل فنى أو مسلسل أو فيلم أو مسرحية أو كتاب أو رواية أواغنية أو لوحة عبارة عن جزء من أعمار ناس ومجهود منهم فضلوا يجتهدوا عشان يطلعوه للناس.

-ال (ماستر بيس) ممكن كمان يبقى تويتة أو ستاتس أو تدوينة .

-أكتب عن أى (ماستر بيس) تعدى عليها وخلينا نشوف اللى انت شايفه فيها.

-كل واحد فينا عنده معلومات وخلفيات وآراء غير التانى عشان كدة ممكن لما يكتب عن حاجة يخلينا نشوف اللى ماحناش شايفينه فيها.

-شكرأ.

أنا كنت هنا

-بعد 100 سنة لما ييجى حد يدخل عالإنترنت -لو كان فى انترنت بعد 100 سنة-ويدخل عالمدونة بتاعتك ويقرا حاجة أو يستفيد من حاجة حيعرف إنك كنت موجود هنا من 100 سنة...بمعنى آخر إنت بتسيب بصمتك فى مدونتك وبتنشر وانت مش عارف مين حيقرأ الكلام ده.

-بعد 100 سنة حتكون انت فى طى النسيان تحت الأرض لكن اللى سبته فى الدنيا زى بوست عالفيسبوك أو تويتة على تويتر أو تدوينة عالبلوجر هى اللى حتفضل منك.